HeKo - retagentejo de la Esperanta Civito
HeKo estas novaĵagentejo je la servo de la establoj en kaj apud la Pakto por la Esperanta Civito, sub la imprimaturo de la Konsulo aŭ lia delegito. La informoj estas: oficialaj de la Civitaj instancoj, se indikitaj per la litero C; bultenaj de paktintaj establoj, se indikitaj per la litero B; alies neoficialaj, pri kio ajn utila por la evoluo de Esperantio, se indikitaj per la litero A. Eblas SENDI KOMENTARION aŭ aboni la semajnan selekton tra la redakcia adreso.
HeKo 499 6-B, 27 jan 12: Demento pri dungoj fare de KCE
En la reta skandalgazeto LibFol aperis la sekva komentario de Andy Künzli: "Sen CO UEA estus kvazaŭ nenio. Pro tio necesas dungi kaj pagi oficistojn, SE ONI POVAS PERMESI AL SI TION (ekzemple KCE antaŭ [ol la prezido de prof. Giorgio] Silfer finance ne povis permesi al si tion, sed tamen dungis plurajn homojn, kaj la ŝuldoj kreskis pli kaj pli -- sed mi ne volas kompari UEA kun KCE)."
Se la opinio de s-ro Künzli estas subjektiva kaj ne atentinda, la informo pri KCE estas malĝusta kaj dementinda. Nek li nek aliaj estis dungitaj de Kultura Centro Esperantista, sed jes de la Fondumo Gastejo Edmond Privat (GEP), en kies buĝeto por 1993 estis enskribita la sumo de okdek tri mil svisaj frankoj pro salajroj. GEP (sub la prezido de s-ino Mireille Grosjean) komence de 1991 maldungis s-ron Claude Gacond kiel direktoron: li restis KCE-komitatano sen honorario. Per letero subskribita de la sama prezidantino, en junio 1994 s-ro Künzli ankaŭ ricevis la anoncon pri la ĉesigo de sia laborkontrakto, pro manko de mono ĉe GEP: proceduro, kiu ebligus peti la subtenon de la asekuro kontraŭ senlaboreco, se la koncernaj kotizoj estus pagitaj.
...HeKo 499 5-C, 26 jan 12: La Konsulo renkontis la aktivulojn de HEA
Laŭ invito de la estraro de Hungaria Esperanto-Asocio, fine de sia mandato la Konsulo pritraktis hieraŭ ĉe la sidejo de HEA en Budapeŝto la temon: "La Esperanta Civito: de la dua al la tria jarkvino". Interalie ĉeestis la plimulto de la HEA-estraro.
Sen. Giorgio Silfer enfokusigis la aktivecon de la Esperanta Civito en Hungario dum la lastaj kvin jaroj. Ĝi inkluzivis la lanĉon de la Internacia Semajno de la Esperanto-Biblioteko ĉe la Fremdlingva Biblioteko, kie situas la Fajszi-kolektaĵo, kaj la kunlaboron kun ITK rilate la LingvoTestan Sistemon de la Esperanta Civito. Transirante al la perspektivoj, sen. Silfer malfermis etan forumon kun la ĉeestantoj, emfazante la neceson ke "Budapeŝto restu Budapeŝto ankaŭ por la esperantistoj".
...HeKo 499 4-A, 25 jan 11: Aromo de moderneco por definitiva muzeo
Pasis multaj jaroj de post mia lasta vizito en Vieno, kaj mi scivolis kiel aspektas la Internacia Esperanto-Muzeo en sia nova sidejo, ne for de la antaŭa en la centra kvartalo Hofburg.
Mi sciis ke ĝi plene integriĝis en la biblioteka sistemo, ne nur jure sed ankaŭ strukture. La unuan konfirmon pri tio donas la pageco: ne plu senpage alirebla biblioteko, sed kontrolata enirejo kun biletpago (tri eŭroj). Konante la esperantistaron, kiu lasas sin senplumigi nur de la Universalaj Kongresoj ("estis granda la impreso, ĉar kotizo estis ŝtel" kantis Gianfranco Molle, laŭ usona melodio kaj vortoj de Renato Corsetti), vi ricevas negativan impreson de tiu konfirmo. Des pli ke, kompare kun antaŭe, ne plu eblas "hazarde" eniri la muzeon.
...HeKo 499 3-B, 24 jan 11: Esperanto reaperas en la Naturamika Internacio
La Naturamika Internacio pretas produkti je propra kosto faldfolion en esperanto pri sia aktiveco, tuj post la akcepto de la Esperanta Naturamikaro kiel membro de la movado. ENa mem liveros la tekston, konforme al la nuna enpaĝigo.
Jen do konkreta rezulto de la renkonto kiun la delegacio de ENa havis hodiaŭ en la centralo de NI en Vieno. La akcepto estos en la tagordo de la ĉi-jara ĝenerala konferenco de NI.
La statuso asignota al ENa estas tiu de partnera asocio. Per tio ĝi rajtos uzi la markon de NI, sed ankoraŭ ne voĉdoni dum la kongresoj. La partneraj asocioj pagas neniom pri sia membreco en NI.
...HeKo 499 2-B, 22 jan 11: Nova organigramo por KCE 2012-2014
La 28an de februaro la Asembleo de Kultura Centro Esperantista renovigos la gvidorganojn. La Asembleon prezidos la eliranta prezidanto, sen. Perla Martinelli.
Al la anoncitaj kandidatoj por la triopa Komitato lastatempe aldoniĝis c-ino Jun Liu. Ŝia edzo, sen. Dieter Rooke, rekandidatas kiel vicprezidanto,
Por la revizora kolegio kandidatas David Buhlmann kaj Leontina Santos. Kiel vicrevizoro Danielle Carrier.
Dum la Kultura Semajnfino tuj post la Asembleo de KCE prelegos gec-anoj Marco Cattaneo el Italio kaj Jun Liu el Popola Ĉinio. Temas pri du debutantaj oratoroj, kies temoj rilatos al la germana respektive al la ĉina kulturo.
...
