HeKo - retagentejo de la Esperanta Civito
HeKo estas novaĵagentejo je la servo de la establoj en kaj apud la Pakto por la Esperanta Civito, sub la imprimaturo de la Konsulo aŭ lia delegito. La informoj estas: oficialaj de la Civitaj instancoj, se indikitaj per la litero C; bultenaj de paktintaj establoj, se indikitaj per la litero B; alies neoficialaj, pri kio ajn utila por la evoluo de Esperantio, se indikitaj per la litero A. Eblas sendi komentarion kaj aboni la printitan semajnan selekton tra la redakcio.
HeKo 395 1-B, 2 jul 09: Nova rekordo en Togolando
En junio 2009 ankaŭ gelernantoj de Institut Zamenhof trapasis du ekzamenojn ŝtatajn en Togolando. La 29an de junio 2009 la rezultoj estas proklamitaj.
En la lasta klaso de la elementa nivelo estas 25 gelernantoj. Ĉiuj sukcesis. Ne tiel estas por la gelernantoj ĉe la kvara (lasta) klaso de la duagrada nivelo. Tie ĉi estis 48 kandidatoj, kaj 46 sukcesis. Dum la procentaĵo de la elementa nivelo estas 100%, tiu de la duagrada estas 95,83%.
Jam kvin jarojn Institut Zamenhof estas unu el la lernejoj kun tre bonaj instrulaboroj en Togolando. La lernado de esperanto en la lernejo kvazaŭ pli lertigas la gelernantojn.
HeKo 394 9-A, 2 jul 09: Lu Wunsch-Rolshoven: UEA estas speco de shtato
Diversaj intelektuloj kaj aktivuloj (neniu el ili havas la esperantan civitanecon) publike kritikis kaj eĉ primokis la nefermitan leteron de la prezidanto de Universala Esperanto-Asocio, d-ro Probal Dasgupta, al kvar ŝtatestroj.
Ni ne donos nian opinion pri tiu letero, ĉar tio kvazaŭ egalus bati batiton. Sed ni komentarios interesan kritikon de s-ro Lu Wunsch-Rolshoven el Berlino.
Skribis Wunsch-Rolshoven: "Oni scius pli bone, kion reprezentanto de Esperanto-organizaĵo iam apogos, se la organizaĵo fiksus klarajn poziciojn en publika teksto. Mi ne konsentas kun la enhavo de la letero de Dasgupta kaj ankaŭ ne kun la maniero komenci tian temon per antaŭe ne interkonsentita papera letero al kvar ŝtatgvidantoj, sed principe la letero povus esti elirpunkto por fiksi tian pozicion. Plej verŝajne tio tamen neniam okazos, ĉar unuflanke en la komitato de UEA kaj ĝenerale inter la membroj ŝajne regas tro granda letargio kaj aliflanke eble ne ekzistas komuna pozicio pri tiaj temoj -- nek pri la enhavo de la letero nek pri saĝa strategio por prezenti tian enhavon."
"Principe UEA laŭ sia idea fono estas planita kiel speco de ŝtato por ĉiuj Esperanto-parolantoj kaj ĝi volas paroli en la nomo de ĉiuj. Praktike por multaj temoj ne ekzistas sufiĉe da konsento pri iuj pozicioj kaj strategioj; sekve kutime oni ne klare esprimiĝas pri iuj temoj. Eble oni timas perdi iujn membrojn per tro klara starpunkto kaj ne vidas avantaĝojn el klare fiksitaj celoj kaj vojoj."
HeKo 394 8-C, 1 jul 09: Eblas kandidatigi al la kvestora posteno
Ekde hodiaŭ ĝis la fino de la monato ĉiu parlamentano de la Esperanta Civito (senatano aŭ delegito ĉe la Forumo) povas proponi kandidatojn por la posteno de kvestoro, kun mandato daŭra ĝis la inaŭguro de la nova Parlamento, komence de 2012.
La kvestoro estas la civitan(in)o kiu administras la monon de la tri povoj, tio estas esence:
a) ricevas periode la konteltirojn de la Civita banko (kvestora konto), kontrolas kaj arkivas ilin;
b) unu fojon jare helpas por la kunordigo de la vojaĝoj al la parlamenta sesio. Interalie la kvestoro decidas pri eventualaj subvencioj aŭ trovas sponsorojn por la plej malriĉaj senatanoj (la elspezoj de la forumanoj estas je la ŝarĝo de la respektiva paktinto).
La mono en a) fontas el: donacoj kaj legacoj, dismoj, subvencioj de la Civita banko, kortumaj rajtoj kaj monpunoj. Ĝis la pasinta monato enestis ankaŭ la pagoj kaj kostoj pro la civitanaj legitimiloj, sed nun ili estas administrataj rekte de la matrikulisto, en la aparta konto Registro.
HeKo 394 7-B, 30 jun 09: Kultura historio de la itala Esperantio
Prof. d-ro Carlo Minnaja, akademiano kaj denaska esperantisto, realigis tre interesan kulturan historion pri la itala Esperantio. La libro, titolita "L'esperanto in Italia", aperis en 2007 ĉe la eldonejo "Il Poligrafo", kaj estas imitinda modelo por la prezento pri la tuta fenomeno al enlanda neesperantista, sed klera publiko.
La lasta paĝo (215) estas tute dediĉita al la Esperanta Civito. Ĝi estas grandparte utiligebla por informado en kiu ajn lingvo. Jen la teksto verkita de c-ano Minnaja.
* * * * *
...HeKo 394 6-C, 29 jun 09: Publika asembleo de la Nova Maldekstro
Per la "Deklaro de la Nova Maldekstro en Esperantio" (aŭgusto 2004) estis difinita la politika linio sur kiu baziĝos la programo de la Verda Listo, okaze de la elektoj por la Senato en 2006. Dum la lastaj tri jaroj la krizo de la malnova maldekstro fariĝis pli kaj pli evidenta en Esperantio: sufiĉas konstati la situacion de la tradiciaj laboristaj esperanto-organizoj.
Sed ankaŭ makrosocie manifestiĝas la krizo de la tradicia maldekstro, precipe en Eŭropo. La maldekstro baraktas en siaj problemoj kaj perdadas la kontakton kun la amasoj ĝuste kiam la fiziokratia kapitalismo ankaŭ krizas, sur la ondo de financaj katastrofoj, precipe en Usono. La konjunkturo nutras la novan dekstron, simile al la fruaj 1930aj.
...
