La Sveda Akademio invitas kandidatigi
Denove agnosko por nia literaturo, danke al Esperanta PEN-Centro: ĝin invitas la Sveda Akademio kandidatigi verkiston al la literatura Nobelo 2012. La invitleteron subskribis la prezidanto de la koncerna komisiono, el Stokholmo.
La Esperanta PEN, laŭ propono de sia membro Manuel de Seabra, en 1998 iniciatis la kandidatigon de William Auld, kiu estis ĉiujare reproponita ĝis sia morto. Post interna konsultiĝo, en 2007 la sola asocio de profesiaj verkistoj kaj redaktoroj en esperanto proponis c-anon István Nemere (kune kun Umberto Eco), kaj post dua interna konsultiĝo ekde 2008 ĝi proponas d-inon Marjorie Boulton. Tio ripetiĝos en 2012.
Alia verkisto en esperanto, Baldur Ragnarsson, estis kandidatigita dum lastaj jaroj por la literatura Nobelo, fare de faka asocio de UEA. La faka asocio tamen malfondiĝis en 2008, kaj la literatura akademio kiu postvenis ĝin probable plu flegis la kandidatigon, kvankam la preskaŭ vegeta stato de tiu akademio dubigas pri efektiva ripetiĝo.
[HeKo 493 7-B, 25 okt 11]