Informoj el PEN Internacia
PEN Internacia nuligis la regionan latin-amerikan konferencon, kiu devus okazi post kelkaj tagoj en Bogoto. Al la ĉefurbo de Kolombio estas kunvokita la PEN-mondkongreso en septembro, sed la situacio povas konduki al plia nuligo.
La prezidinto de Pola PEN-Centro prof. Władysław Bartoszewski ricevos nunjare la premion de la germana urbo Kassel pro la kontribuo al la interpaciĝo inter poloj, germanoj kaj judoj. La ĵurio atribuanta tiun ĉi premion substrekis lian ĉi-kampan "senlacan engaĝon". Raportas korespondisto de la Pola Radio, Maciej Wiśniewski: "Kiel akcentis la ĉefa ĵuriano Hansjörg Melchior, kvankam profesoro Bartoszewski travivis la teruran sperton de la Auŝvica koncentrejo, li senlace aktivas por reciproka proksimiĝo de germanoj kaj poloj. Kiel historiisto, sindikatano kaj politikisto li ĉiam engaĝis sin favore al interpaciĝo". Profesoro Bartoszewski estis elektita kiel laŭreato inter dudek kandidatoj.
[HeKo 347 9-B, 11 mar 08]
