Dekreto Karibe-Blanco-Silfer

Pri la transnaciaj festotagoj

La Konsulo,
la Vickonsulo pri internaj aferoj,
la Vickonsulo pri financoj,
 

nome de la Senato

dekretas

1) Per la vorto “transnacia festotago” oni indikas tagon ekster sabato kaj dimanĉo kiam stabano, ie ajn, rajtas ne deĵori. Kaze de deĵoro dum tia tago eblas rekupero dum labortago aŭ tago indikita en la punkto 5 (kvina) de ĉi tiu dekreto.

2) La transnaciaj festotagoj povas esti universalaj, ekvivalentaj (al la kvar konstituciaj festotagoj), prioritate rekuperaj, geografie liberaj.

3) Universalaj festotagoj estas: 1^a de Januaro (Novjartago), 6^a de Januaro (Epifanio), Vendredo kaj Lundo de Pasko (laŭ la gregoria kalendaro), 1^a de Majo (Festo de la Laboro), 1^a de Novembro (Ĉiuj Sanktuloj), 25^a kaj 26^a de Decembro (Kristnasko aŭ Julo).

4) Ekvivalentaj festotagoj estas la ĵaŭdo de Pasko (anstataŭ la 14^a de Aprilo), la lundo de Pentekosto (anstataŭ la 2^a de Junio), la 15^a de Aŭgusto (anstataŭ la 10^a de Aŭgusto), la 8^a de Decembro (anstataŭ la 15^a de Decembro), pro la supozo ke en niaj Konstituciaj festotagoj stabano estas okupita (pro ceremonio, Zamenhofa festo, elektoj ktp) kaj tial rekuperas la tagon aŭtomate en fiksa dato.

5) Prioritate rekuperaj estas kelkaj fiksaj tagoj por rekuperenda semajnfino. Temas pri la 8^a de Marto, la 12^a de Oktobro (nur se la stabano estas tiam en Hispanio aŭ Latin-Amerika lando) la 24^a kaj la 31^a de Decembro.

6) Geografie liberaj estas la regiona/kantona festotago: 28^a de Februaro (se la stabano estas tiam en Andaluzio) aŭ la 1^a de Marto (se aliloke); kaj la nacia festotago, kiu koincidas kun la lando kie situas tiam la stabano (se en Svislando la 1^a de Aŭgusto, se en Hispanio la 6^a de Decembro, se en Hungario la 15^a de Marto, ktp).

7) Se dum misio stabano decidas preni tagojn de libertempo (inkluzive rekuperon), ili ne estas konsidereblaj kiel parto de la financa traktado en misio.

8) La dekreto aplikiĝas eksperimente dum du jaroj kaj estas revizienda surbaze de la spertoj. La koncernataj stabanoj bonvolas tuj komuniki eventualajn malkongruojn (ekzemple pro la Paska dato en kristane ortodoksaj socioj).

legite, aprobite, subskribite.

Riichi Karibe, Konsulo,
la 25^an de majo 2022