Komuniki trafe kun Civitaj instancoj kaj paktintoj
La Vickonsulo rememorigas ke nur la skribaj komunikoj per ordinara aŭ per elektronika poŝto estas traktendaj de la Civitaj instancoj kaj la paktintaj establoj. Mesaĝoj per telefono, skajpo, Facebook kaj aliaj telematikaj rimedoj riskas ignoron.
Tio aparte gravas se temas pri aliĝo al aranĝo: Kultura Esperanto-Festivalo, NaturAmika KulturSemajno en Esperanto, kursoj kaj staĝoj en Eŭropo kaj Afriko... Kaj kompreneble por mesaĝoj al la Civita "banko" aŭ al la redakcioj.
Respondante al retmesaĝo oni atentu pri la temlinio: se ĝi ne kongruas kun la temo, ĝi estas modifenda. Pluraj stabanoj plenumas diversajn oficojn: pri la apartaj temoj oni skribu al la koncernaj oficaj retadresoj, ne al la privata, ĉar tio postulas plusendon kaj kaŭzas malfruon.
[HeKo 831 3-C, 5 feb 24]
