La Kapitulo kunsidis hodiaŭ, kun la komenca partopreno de la Konsulo, kiu proponis fruigi la finon de la nuna mandato je 15 decembro 2023, pro sia misfarto kaj la malsano de la Vickonsulo. La Kapitulo en pleno (ĉeestis ankaŭ sen. Conde Rey, konvaleska post operacio) unuanime apogis la proponon, kiu transiros al la Senato por la definitiva aprobo, 2 aŭgusto 2023.

Ambaŭ partioj batalantaj en Ukrajno (sen distingo inter agresatoj kaj agresantoj) malvenkis en Kataro, okaze de la monda futbalturniro. Al la ukrajna prezidento (fakte ne ukrainlingva, sed ruslingva judo) Volodimir Oleksandroviĉ Zelenskij estis rifuzita la ŝanco alparoli la spektontaron antaŭ la granda finalo Argentino-Francio.

De pluraj jaroj en la naturamika Esperanto-Domo (inaŭgurita 12 oktobro 2012 fare de la tiama Konsulo, sen. Marie-France Conde Rey) estas la sola loko en Malago, kaj ofte en Andaluzio, kie oni festas la Tagon de la Esperanta Kulturo. Hieraŭ vespere la festantoj kuniĝis en la Domo danke al la gastama organizo de sen. Manuela Blanco, sekretario de Esperanta Naturamikaro.

Venontsemajne la opozicio liveros al la Kapitulo, pere de la Blanka grupestrino, sen. Anna Bartek, proponon de aldona amendo al “Lex adiutoria” (pri la Civita stabo). Temas pri tria ĉapitro, dediĉita al la engaĝo de stabanoj en establoj ekster la Pakto. La novaj normoj koncernus unuavice la parlamentanojn.

Ĉi-monate eksplodis granda skandalo ĉe la Parlamento de Eŭropa Unio, ĉar ĝia vicprezidantino, la 44-jara Eva Kaili el Grekio, estis arestita pro la enpoŝigo de granda bakŝiŝo, celanta favori eksterunian ŝtaton (Kataron, kie disvolviĝas la monda futbalturniro). Simila sorto trafis ŝian parlamentan ekskolegon, la 67-jaran Pier Antonio Panzeri el Italio.

Paralele al la sukcesa fakrondo pri bibliotekoj kaj arkivoj, dua fakrondo aktivas ekde hodiaŭ pri esperanto-domoj kaj kulturcentroj. En ĝi partoprenas reprezentantoj de domoj en Bulgario, Burundio, Hispanio, Svedio, Svislando, kaj membroj de la societoj kiuj posedas Greziljonon respektive La Kvinpetalon: ili ĉiuj havas la esperantan civitanecon kaj intervenas je individua rajto.

La Konsulo de la Esperanta Civito, sen. Riichi Karibe, estis operaciita en japana hospitalo kaj konvaleskas hejme. Ĉi-semajne ankaŭ alia membro de la Kapitulo, sen. Marie-France Conde Rey, estos operaciita en franca kliniko. Jam tria persono, sen. Julio Herrero, estas delonge malsana: li mem estas la Unua Vickonsulo, kiu devus anstataŭi la malsanan prezidanton, laŭ la konstitucio.

La Komitato de Itala Interlingvistika Centro kunsidis telematike hodiaŭ, sub la prezido de prof. Giorgio Silfer, kiu detale informis la ĉefajn Civitajn stabanojn en Italio pri la decido de la Esperanta PEN inviti la verkistaran mondkongreson, invito kiu koncernas almenaŭ tri urbojn en Italio.

Tuj post sia Zamenhofa festo, Kultura Centro Esperantista estos fermita de la 18a ĝis la 29a de decembro, pro interna domflegado fare de Pro Esperanto kiel regio. Farbado kaj etaj riparoj estos plenumitaj de Civila Esperanta Servo; ili koncernos ankaŭ unu el la apartamentoj de LF-koop en Ĉaŭdefono.

La diskuto pri la buĝeto 2023 de la Universala konfrontigis UEAn kaj ĝian junularan sekcio. La UEA-estraro rezistis kontraŭ amendopropono de la TEJO-reprezentanto, kiu altigus la deficiton ĝis 49.000 eŭroj proksimume. La Komitato tamen aprobis la proponon, per 15 jesoj, 10 neoj kaj 7 sindetenoj: la Estraro do perdis la plimulton.

“La filozofio de paco de Kant ĝis esperantismo” estas la temo de seminario, en du semajnfinoj, preparata de prof. Giorgio Silfer por Afrika Esperanto-Instituto. Ĝi disvolviĝos en la Tanganika Esperanto-Domo de Buĵumburo, sed eblos ankaŭ ripeti ĝin en la franca, eventuale en universitato..

Interesa kaj utila renkonto hieraŭ apud la Garda Lago inter la prezidanto de la itala federacio de la naturamikoj, s-ro Christian Facchetti, kaj la vicprezidanto de Esperanta Naturamikaro, c-ino Perla Martinelli, kune kun la delegito de ENa ĉe la Asembleo de Naturfreunde Internationale, sen. Giorgio Silfer.