Afrika Esperanto-Instituto, aliĝinta al la Pakto por la Esperanta Civito, diskonigas sian Strategian Deklaron ĝuste hodiaŭ, en la Tago de la Pakto:

La nuna ĉefredaktoro elektis Budapeŝton por prezenti la 300an numeron de “Literatura Foiro”,  kaj pli da ĉeestantoj ol kutime honoris la hieraŭan literaturan kafejon, organizitan de Fajszi Amika Rondo sub la aŭspicio de Esperanta PEN-Centro, ĉe la orienta legacio de la Esperanta Civito.

Ekde la venonta jaro interesa kultura fenomeno eliras la aktualecon kaj eniras la historian arkivon de la esperanta popolo. Laŭ informo de la lasta prezidanto, Pál Koszuch, ne plu okazos Internacia Esperanto-Konferenco, ne plu estos asignata la libropremio, ne plu aperos “La Gazeto”. Ilia referenca institucio, OSIEK, ĵus malfondiĝis.

Heroldo de Esperanto ne plu raportas detale pri la Universala Kongreso, male al la eldona epoko de LF-koop; sed ĝi akurate kaj fidele informas pri la evoluo de Esperantio, ankaŭ lige kun UK.

Mi revenis hejmen de mia tria (kaj supozeble lasta) UK, en Lahti. Estis interese fari turisman viziton en Esperantujo. Kelkaj aferoj ja plaĉis, precipe iuj artaj aranĝoj. Krome mi ĝojis, kiam kelkaj nekonatoj spontane alparolis min, dirante ke ili legis kaj ĝuis “ĉiujn miajn librojn”. Tian etan troigon mi facile pardonis…

Pasis pli ol tridek jaroj post la debuto, sed Kimo restas nesuperebla animanto por jam tri generacioj de la esperanto-junularo. Tion li demonstris ankoraŭ hodiaŭ dum la 75a Internacia Junulara Kongreso, kie la gefiloj (aŭ eĉ genepoj) de aktivaj esperantistoj okaze de la unua Kultura Esperanto-Festivalo en Upsalo (1986) entuziasmiĝis pro liaj muziko, kantado kaj vervigado.

Rimarkinda procento de la populacio en la provinca ĉefurbo proksima al la TEJO-kongresejo, Liptovský Mikuláš, estis hebrea ĝis la dua mondmilito. Same alta estas kaj restas la procento de roŭmoj en Slovakio. Hodiaŭ liturgie senutila post la ekstermo de la hebreoj fare de la Tria Regno, la granda kaj stile interesa sinagogo de Mikulaŝo funkcias kiel kulturcentro.

Du reprezentantoj de la Kapitulo de la Esperanta Civito (inter ili la Konsulo) kaj kvar reprezentantoj de la Estraro de TEJO (inter ili la eniranta prezidanto kaj eliranta vicprezidanto) havis tuthoran konsultiĝon hieraŭ vespere dum la Internacia Junulara Kongreso en Slovakio.

Malgraŭ someraj fulmotondroj serene disvolviĝas la Internacia Junulara Kongreso, bone organizita de Slovaka Esperanto-Junularo en Liptovsky Hrádok, piede de la Tatra montaro. La sereneco montriĝas ankaŭ ĉe la Komitato de Tutmonda Esperantista Junulara Organizo, kiu ĵus elektis unu el la plej interkontinentaj estraroj en sia historio, tamen prezidatan de eŭropano.

La 55a literatura kafejo en Budapeŝto, organizata de Fajszi Amika Rondo sub la aŭspicio de Esperanta PEN-Centro, havos eksterordinaran gastinon. La ĉefredaktoro mem de “Literatura Foiro” prezentos al la publiko la 300an numeron de la revuo, ĵaŭdon la 8an de aŭgusto ekde 18h00 ĉe la orienta legacio de la Esperanta Civito.

“La Komitato donis la taskon al la nova financa komisiono en la daŭro de ses monatoj redakti konkretan planon kun alternativoj kaj kostoj. La financa komisiono akceptas konsilojn de ĉiuj membroj de UEA. Atendante apartan tiucelan ret-adreson, viaj konsiloj estas bonvenaj ĉe mi, kiu transdonos ilin al la tuta komisiono.”

Kultura Centro Esperantista de kvindek jaroj funkcias kiel libroservo, de kvardek kiel internacia feria altlernejo (unua sesio en 1979), de tridek kiel konferenca centro (Internacia Literatura Forumo pri Edmond Privat en 1989; regulaj konferencoj rekomenciĝis en 1998), de dek tri kiel ekzamena centro kuplita al ALTE (laŭ direktivo Mühlemann pri la Lingvotesta Sistemo de la Esperanta Civito).