Dum en aprilo 2023 la publiko finfine ĝuas la oktobran numeron (de 2022!) de alia kultura revuo en esperanto (el Ameriko), en majo la abonantaro frandos jam la junian numeron (de 2023) de “Literatura Foiro”, organo de Esperanta PEN-Centro, fondita en 1970 de literatura rondo “La Patrolo”, produktata en Eŭropo.
La teamo de Esperanta PEN-Centro, kunlabore kun la skipo de la Formiketoj (organizanta la NaturAmikan KulturSemajnon en Katalunio), difinis la profesiajn oficojn por la proponita mondkongreso de PEN Internacia, kiu okazus en krozoŝipo dum la unua semajno de oktobro 2024.
La Kapitulo de la Esperanta Civito kunsidis hodiaŭ parte telematike, sub la prezido de la Unua Vickonsulo, kun la partopreno de la invititaj Senataj grupestrinoj. Komence oni redistribuis tri delegojn: la konsorcia agendo transiris de informado al internaj aferoj, bibliotekoj kaj arkivoj de klerigado al informado, legacioj de internaj aferoj al eksteraj aferoj.
Dum sia hodiaŭa kunsido la Abeletoj difinis la provizoran programon de la 12a Kultura Esperanto-Festivalo, kiu disvolviĝos en Ĉaŭdefono ekde 24 julio 2023, per urba promenado (specife ĉiĉeronado pri la arkitekturaj kontribuoj de Edouard Janneret, antaŭ ol li fariĝis Le Corbusier) kaj la interkona vespero en la Esperanto-Domo.
HeKo 810 4-C, 16 apr 23
Ekde la 2a de junio 2023 ne plu ekzistos la konto LFOI-I ĉe la financa servo de Universala Esperanto-Asocio. Lastaj enpagoj estas administrataj ĉi-monate. La perantoj kaj klientoj kiuj ankoraŭ uzis tiun konton ricevos apartan informon pri la estontaj pagokanaloj.
HeKo 810 3-C, 14 apr 23
La 14a de aprilo 2023 (honore al la morto de Zamenhof, Tago de Ĉiuj Pioniroj kaj festotago laŭ la Konstitucio de la Esperanta Civito) meritas rememoron pri esperantanoj kiuj ĝuste en alia 14a de aprilo (1895) inaŭguris tutan movadon: la naturamikan. Tiam sesdeko da migrantoj rendevuis ĉe la Suda Stacidomo en Vieno: ili estis ĉiuj lokaj socialdemokratoj.
Iĝas pli kaj pli sombra la geopolitika horizonto, ne nur pro la eternaj konfliktoj en Afriko kaj la interslava milito en Eŭropo, nun ŝajne en pozicio de pato. Fakte ripetiĝas pri Formozo la sama paradigmo kiu kondukis al la milito en Ukrajno: granda potenco volas akiri teritorion kiu antaŭ pli ol jarcento ankoraŭ apartenis al ĝi (ĉi-kaze Pekino).
Tial ke la suba informo aperis en la oficiala retejo de Tutmonda Esperantista Junulara Organizo sen subskribo la 1an de aprilo, ni hezitis pri ĝia seriozeco.
Afrika Centro Esperantista en Togolando anoncas la lanĉon de kvar premioj. “Homoj tra la mondo vere dediĉas sin preskaŭ tute al Esperanto. ACE taskas al si disponigi distingilojn al iuj el tiuj homoj. Dum premioj havos nomojn de esperantistoj, aliaj esperantistoj precipe afrikaj havos tiujn premiojn pro laboroj faritaj. ACE disponigas almenaŭ cent eŭrojn por ĉiu premiito.”
Kiel multaj aliaj klientoj en Svedio Esperanto-Garden pagis tro multe por la lastatempa multekosta elektro. La nova registaro promesis repagi grandan parton, tamen en malprofesia maniero fuŝas kaj atendigas tro longe la klientojn. Tial ekzistas la konkreta timo, ke iu kreditanto estos pli rapida ol la ŝtato kaj postulos tujan bankrotigon de Esperanto-Garden.
Ĉiumonate la Sekureca Konsilio de Unuiĝintaj Nacioj ŝanĝas prezidanton, laŭ rotacio de la dek kvin membroj, el kiuj kvin estas konstantaj. Se aritmetiko ne estas opinio, sed ekzakta scienco, la membro M prezidanta en februaro 2022 devus reprezidi en majo 2023.
HeKo 809 6-C, 4 apr 23
Rekomenciĝis ĉi-semajne la kunsidoj de la fakrondoj kaj organizaj nukleoj aktivaj en la Esperanta Civito. La unua estis tiu de la Abeletoj, kiuj zorgas pri la 12a Kultura Esperanto-Festivalo (Ĉaŭdefono, 2-29 julio 2023): ili okupiĝis pri la programo, al kiu mankas ankoraŭ malmultaj detaloj.
