Tial ke la suba informo aperis en la oficiala retejo de Tutmonda Esperantista Junulara Organizo sen subskribo la 1an de aprilo, ni hezitis pri ĝia seriozeco.

Afrika Centro Esperantista en Togolando anoncas la lanĉon de kvar premioj. “Homoj tra la mondo vere dediĉas sin preskaŭ tute al Esperanto. ACE taskas al si disponigi distingilojn al iuj el tiuj homoj. Dum premioj havos nomojn de esperantistoj, aliaj esperantistoj precipe afrikaj havos tiujn premiojn pro laboroj faritaj. ACE disponigas almenaŭ cent eŭrojn por ĉiu premiito.”

Kiel multaj aliaj klientoj en Svedio Esperanto-Garden pagis tro multe por la lastatempa multekosta elektro. La nova registaro promesis repagi grandan parton, tamen en malprofesia maniero fuŝas kaj atendigas tro longe la klientojn. Tial ekzistas la konkreta timo, ke iu kreditanto estos pli rapida ol la ŝtato kaj postulos tujan bankrotigon de Esperanto-Garden.

Ĉiumonate la Sekureca Konsilio de Unuiĝintaj Nacioj ŝanĝas prezidanton, laŭ rotacio de la dek kvin membroj, el kiuj kvin estas konstantaj. Se aritmetiko ne estas opinio, sed ekzakta scienco, la membro M prezidanta en februaro 2022 devus reprezidi en majo 2023.

Rekomenciĝis ĉi-semajne la kunsidoj de la fakrondoj kaj organizaj nukleoj aktivaj en la Esperanta Civito. La unua estis tiu de la Abeletoj, kiuj zorgas pri la 12a Kultura Esperanto-Festivalo (Ĉaŭdefono, 2-29 julio 2023): ili okupiĝis pri la programo, al kiu mankas ankoraŭ malmultaj detaloj.

“Kun malaperanta membraro, Islanda Esperanto-Asocio vendis sian Skolavordustigur-proprieton kaj estas nun serĉanta hejmon por sia kolekto de ses mil esperanto-verkoj. La Nacia Biblioteko ne estas interesata, lasante sen solvo la demandon pri tiu ĉi unika arkivo” anoncis en novembro 2022 loka anglalingva gazeto. Ne estas konata la sorto de tiuj societaj biblioteko kaj hemeroteko.

Lasta pretervivanto el la generacio de la Montevidea renesanco, konsiderata kiel la plej avangarda poeto en la unua eldono de la “Esperanta Antologio” de William Auld, mortis en Teksaso, 14 decembro 2022, jam 92-jara. Temas pri Edwin de Kock, sudafrika kaj usona (ekde 2000) instruisto kaj verkisto (angle, afrikanse, Esperante), adventista predikanto kaj misiisto, ekde 1955 esperantisto.

Pro grava malsano la 26an de marto 2023 sen. Julio Herrero demisiis kiel Vickonsulo kaj kiel senatano. Liaj specifaj delegoj estis delonge atribuitaj al aliaj membroj de la Kapitulo.

La Konsulo de la Esperanta Civito anoncis hodiaŭ leĝoproponon subskribitan unuavice de sen. Anna Bartek (Blanka grupo). Temas pri aldona amendo al Lex Adiutoria (pri la Civita stabo). Aprobante tiun leĝon en oktobro 2022, la Senato ne okupiĝis pri eventualaj intereskonfliktoj en la Esperanta Civito. Dum la staĝo por stabanoj en Bujumburo, februare 2023, okazis debato pri la temo.

Kvar eminentaj prelegontoj gastos en la 9a Lingva Kolokvo de Kultura Centro Esperantista, kiu okazos reale (kiel ĉiu evento de KCE) 28 aprilo — 1 majo 2023. Ili estas d-ro Alessio Giordano, mag. Ruben Fernandez, d-ro Sebastien Moret kaj d-ro Giorgio Silfer. Oni atendas la konfirmon de kvina prelegonto.

Laŭ komuniko de la novaĵagentejo Associated Press, “La Kalifornia Kortumo en januaro 2023 kasaciis la verdikton kontraŭ Billy Waldon (Sequoyah), esperantisto sidanta en la mortoalo de la prizono de San-Kvinteno, post kondamno en decembro 1991 pro la murdo de tri personoj en San-Diego, ses jarojn antaŭe.

“Lastatempe venis la decido de la Eŭropa Komisiono pri nia kandidatiĝo por la administra subvencio (sub la fonduso Erasmus Plus).