La Asembleo de Esperanta Naturamikaro decidis inviti al Malago, por oktobro 2018, la trian Artan Renkonton Transnacian en Esperanto. La decidon inspiris propono de c-ano Pedro Carrillo.

ENa subtenos ankaŭ ornitologian semajnon ĉe la Danuba delto, dum printempo 2018.

La naturamikoj aprobis la jarraportojn kaj diskutis pri la situacio en la tegmenta asocio.

D-ro Vilmos Benczik gastis ĉi-vespere ĉe la literatura kafejo organizita de Fajszi Amika Rondo ĉe la orienta legacio de la Esperanta Civito en Budapeŝto, sub la aŭspicio de la Esperanta PEN.

PEN Internacia esprimis sian starpunkton pri la ruino de esprimlibero kaj amasmedia komunikado en Turkio, hodiaŭ ĉe la 34a speciala sesio de la Homrajta UN-Konsilio. La deklaro estis subskribita ankaŭ de la Esperanta PEN, kune kun sepdeko da organizoj (la duono estas PEN-centroj).

Kvankam la Komitato de Kultura Centro Esperantista rezignis pri kolektiva abono al “Heroldo de Esperanto” (sed nur la decidoj de la papo en Romo estas nemodifeblaj…), KCE reklamas en originala maniero la gazeton venditan de LF-koop al Sociala Grupo Lexus.

Feminisma Esperanta Movado kaj la redakcio de “Literatura Foiro” ĉeestas per oficialaj akreditivoj la 39an Internacian Festivalon de la Femina Filmo, ĉi-semajne apud Parizo. La festivalo proponas dekojn da kurt- kaj longmetraĵojn el la tuta mondo: pri kelkaj el ili aperos recenzoj en “Literatura Foiro” danke al la gekorespondantoj Perla Martinelli kaj Giorgio Silfer.

Post du semajnoj ĝi celebros la sesdekan datrevenon de la Traktato de Romo, sed la etoso tute ne ŝajnas festa por Eŭropa Unio. Unuflanke, oni atendas la formalan demarŝon por komenci la proceduron de eksiĝo de Britio. Aliflanke, komplikiĝas la rilatoj kun la membroŝtatoj en oriento, unuavice Pollando.

Nome de la Esperanta Civito la eliranta Konsulo, Marie-France Conde Rey, akceptis la afablan peton pri aŭspicio por la 8a Afrika Kongreso de Esperanto, en Buĵumburo 22-27 decembro 2017.

Chamberline Nguefack Zedong, nova Konsulo ekde la venonta monato, interalie kun delego pri Afriko, estas komisiita pri la rilatoj kun LKK, kun la helpo de la Vickonsulo.

Unuafoje la prezidanto de la Eŭropa Konsilio estis elektita sen unuanimeco. Kontraŭ s-ro Donald Tusk voĉdonis ĝuste lia patrujo, Pollando. Temis pri reelekto, por la dua parto de la mandato, kiu finiĝos en 2019.

La 8a Afrika Kongreso de Esperanto estas anoncita en Buĵumburo, ĉefurbo de Burundio, 22-27 decembro 2017.  La ĉefa organizanto estas SIPU, paktinta establo gvidata de sen. Frederiko Nimubona. Lokon kaj daton komune elektis UETA, post rezigno de la niĝeria landa asocio.

La problemoj kiuj suferigas la inan duonon de la homaro estas ankoraŭ la samaj en 2017. Unuavice la perforto, kies viktimo la virinoj pli kaj pli ofte estas. Poste la negativa diferenco en la salajrado, la duobla pezo laboro-hejmo, la minoritata rolo en la gvidado de la socio. Ĉio ĉi trovas specifan terminon: masklismo.

Plej progresas la franclingva varianto de la informa broŝuro pri la esperanta literaturo, danke al la diligento de sen. Marie-France Conde Rey. Ŝi estas produktanta elegantan version de la enkondukaj ĉapitroj al la kvin periodoj de nia literaturo, el la fama, duoble premiita verko de c-anoj Carlo Minnaja kaj Giorgio Silfer.

La okcidenta legacio de la Esperanta Civito en Bruselo gastigos studrondon pri la Protokolo de Donostia/San-Sebastiano, 17 aprilo 2017, sub la gvido de sen. Giorgio Silfer, Vickonsulo.