HeKo 778 4-C, 19 dec 21
Ankaŭ en Popola Ĉinio ĉesos radioelsendoj en esperanto: la ŝtato rezignis pri ili, oficiale pro la eksmodeco de la rimedo. Fakte nia lingvo nur perdos propagandilon de la pekina politiko, same kiel en 2000 okazis per la papera “El Popola Ĉinio”, ĵus festinta oran jubileon (“Heroldo de Esperanto” estis la sola kiu sukcesis anticipe diskonigi la tiaman novaĵon).
Aperis la decembra numero 2327 de “Heroldo de Esperanto”, kiu kompletigas la 97an jarkolekton de la gazeto, monata informilo de Kultura Centro Esperantista, kiu redaktas, posedas kaj administras ĝin en Svislando, sed eldonas en Bulgario.
Pere de sia vicredaktoro Pawel Fischer-Kotowski la retgazeto “La Ondo de Esperanto” intervjuas famajn esperantistojn pri kiu(j) esperanto-evento(j) en la pandemiaj jaroj 2020-2021 estis la plej pozitiva(j) kaj la plej negativa(j), kaj kiel la aldemanditoj mem esperantumis en ĉi tiu periodo. C-ano Giorgio Silfer ĵus respondis:
“Komence de 2021 Universala Esperanto-Asocio pere de sia komisiono eklaboris por enkonduki du novajn erojn en la ekzamensistemon: aldoni la plej altan nivelon (C2) kaj ebligi al kandidatoj trapasi plene rete la ekzamenojn.
HeKo 777 9-C, 15 dec 21
La Kapitulo kunsidis skajpe hodiaŭ, sub la prezido de la Konsulo, sen. Riichi Karibe. La plej grava tagordero estis analizo pri la stato de Esperantio, al kiu estis invititaj ankaŭ la senataj grupestrinoj: Lorena Bellotti por la majoritato kaj Anna Bartek por la opozicio. Laŭ peto de la Konsulo, la diskuton enkondukis duonhora raporto de sen. Giorgio Silfer, kapitulano.
HeKo 777 8-C, 14 dec 21
En 2021 la Esperanta Civito, pere de Kultura Centro Esperantista, ricevis du subvenciojn de Konsilio de Eŭropo, por financi laborgrupojn pri la projekto LASLLIAM (Alfabetigo kaj sekundara lingvolernado por la lingva integrigo de adoltaj migrantoj), gviditajn de sen. Lorena Bellotti, prezidanto de KCE kaj profesie lernejestro.
Hungaria Esperanto-Asocio invitis d-ron Giorgio Silfer prelegi pri “Heroldo de Esperanto” okaze de la ĉi-jara, tre sukcesa Zamenhofa festo en Budapeŝto. Al plena salono c-ano Silfer skizis en rapida panoramo la centjaran vivon de HdE, fondita en 1920 de Teo Jung en Kolonjo.
HeKo 777 6-C, 9 dec 21
Sen. Manuela Blanco restadis du semajnojn en Stokholmo, kadre de misio subtene al la norda legacio de la Esperanta Civito. Tiucele ŝi renkontis diversajn aktivulojn: inter ili situas kunlaborantoj por la nordeŭropa areo.
Dum la lastaj semajnoj de 2021 Budapeŝto situis en la kerno de niaj establoj. Fajszi Amika Rondo rekomencis regulan okazigon de literaturaj kafejoj, sub la aŭspicio de la Esperanta PEN. Ĉi-lasta interesiĝis pri la eldono de la franca versio de “Vojaĝo al Kazohinio” de Sandor Szathmari.
Esperanta Naturamikaro aktive partoprenas en telematikaj kunsidoj de Naturamika Junularo, kies sidejo situas en Prago. La delegito de ENa estas c-ino Ĥadiĝa Alieva, staĝanta ĉe la orienta legacio de la Esperanta Civito.
C-ano Marek Bamberski rimarkigas ke “la komisarino de Eŭropa Unio pri egaleco, Helena Dalli, en sia ĵus preparita gvidilo pri “inkluziva” komunikado prezentas, kiuj vortoj estas akcepteblaj por EU kaj kiuj ne estas akcepteblaj. En la listo de malbonvenaj vortoj troviĝas: “sinjorinoj kaj sinjoroj, Kristnasko, baptonomo, Maria, Johano, civitano”.
HeKo 777 2-C, 26 nov 21
La fakrondo pri bibliotekoj kaj arkivoj daŭrigas siajn semajnajn kunsidojn, kun la partopreno de aktivuloj el Bulgario, Francio, Hispanio, Italio, Katalunio, Svedio, Svislando. Preskaŭ ĉiuj havas la esperantan civitanecon.
