HeKo 802 4-C, 12 dec 22
Paralele al la sukcesa fakrondo pri bibliotekoj kaj arkivoj, dua fakrondo aktivas ekde hodiaŭ pri esperanto-domoj kaj kulturcentroj. En ĝi partoprenas reprezentantoj de domoj en Bulgario, Burundio, Hispanio, Svedio, Svislando, kaj membroj de la societoj kiuj posedas Greziljonon respektive La Kvinpetalon: ili ĉiuj havas la esperantan civitanecon kaj intervenas je individua rajto.
HeKo 802 3-C, 11 dec 22
La Konsulo de la Esperanta Civito, sen. Riichi Karibe, estis operaciita en japana hospitalo kaj konvaleskas hejme. Ĉi-semajne ankaŭ alia membro de la Kapitulo, sen. Marie-France Conde Rey, estos operaciita en franca kliniko. Jam tria persono, sen. Julio Herrero, estas delonge malsana: li mem estas la Unua Vickonsulo, kiu devus anstataŭi la malsanan prezidanton, laŭ la konstitucio.
La Komitato de Itala Interlingvistika Centro kunsidis telematike hodiaŭ, sub la prezido de prof. Giorgio Silfer, kiu detale informis la ĉefajn Civitajn stabanojn en Italio pri la decido de la Esperanta PEN inviti la verkistaran mondkongreson, invito kiu koncernas almenaŭ tri urbojn en Italio.
Tuj post sia Zamenhofa festo, Kultura Centro Esperantista estos fermita de la 18a ĝis la 29a de decembro, pro interna domflegado fare de Pro Esperanto kiel regio. Farbado kaj etaj riparoj estos plenumitaj de Civila Esperanta Servo; ili koncernos ankaŭ unu el la apartamentoj de LF-koop en Ĉaŭdefono.
La diskuto pri la buĝeto 2023 de la Universala konfrontigis UEAn kaj ĝian junularan sekcio. La UEA-estraro rezistis kontraŭ amendopropono de la TEJO-reprezentanto, kiu altigus la deficiton ĝis 49.000 eŭroj proksimume. La Komitato tamen aprobis la proponon, per 15 jesoj, 10 neoj kaj 7 sindetenoj: la Estraro do perdis la plimulton.
“La filozofio de paco de Kant ĝis esperantismo” estas la temo de seminario, en du semajnfinoj, preparata de prof. Giorgio Silfer por Afrika Esperanto-Instituto. Ĝi disvolviĝos en la Tanganika Esperanto-Domo de Buĵumburo, sed eblos ankaŭ ripeti ĝin en la franca, eventuale en universitato..
Interesa kaj utila renkonto hieraŭ apud la Garda Lago inter la prezidanto de la itala federacio de la naturamikoj, s-ro Christian Facchetti, kaj la vicprezidanto de Esperanta Naturamikaro, c-ino Perla Martinelli, kune kun la delegito de ENa ĉe la Asembleo de Naturfreunde Internationale, sen. Giorgio Silfer.
Ĉu la PEN-verkistaro mondkongresos en Esperantio? La inviton al PEN Internacia ĵus aprobis la ordinara Asembleo de la Esperanta PEN, okazinta hodiaŭ en Padovo sub la tagprezido de c-ano Carlo Minnaja, kun la partopreno, reala delega aŭ virtuala, de ok el la dudek membroj.
Itala Interlingvistika Centro organizis ĉe Milana Esperanto-Klubo hieraŭ vespere prezenton pri la lastaj libroj de Giorgio Silfer: la antologio “Verda stelo kaj roza triangulo” kaj la komiksa albumo “Esperantio vivas”.
HeKo 801 5-C, 1 dec 22
La vickonsulo pri internaj aferoj, sen. Manuela Blanco, atingas hodiaŭ Svedion por dusemajna deĵoro ĉe la norda legacio de la Esperanta Civito. La deĵoro celas fortigi la reton de kontaktoj: kaj por plimultigi aliĝojn al iniciatoj respektive la aĉeton de produktoj el la paktintaj establoj, kaj por prepari estontan aranĝon en Stokholmo.
La prezidanto de PEN Internacia, Burhan Sonmez, prezentis en Milano hodiaŭ sian ĵus italigitan verkon, “Ŝtono kaj ombro”, eldonitan de Nottetempo. Okaze de tiu prezento en la librejo “Verso”, gec-anoj Chiara Macconi kaj Giorgio Silfer longe interparolis pri temoj rilataj al PEN Internacia.
La esperanta popolo bezonas realajn renkontojn. Tiurilate ekzistis du eblecoj: kongresi nacie aŭ internacie en malsamaj lokoj de jaro al jaro, kunveni en loka klubo de semajno al semajno aŭ de monato al monato.
