Suferante pro nekuracebla malsano, c-ino Marie-France Conde Rey lasas la redakcion de “Literatura Foiro”, post jardekoj da fruktodona kunlaborado, kiu larĝiĝis ankaŭ al la redakcioj de “Femina” kaj de “Heroldo de Esperanto”.
Dum sia hodiaŭa telematika kunsido la redakcio de “Literatura Foiro” interalie pritraktis demandon levitan de c-ano Carlo Minnaja pri la recenzeblo kaj recenzindo de virtualaj libroj. La demando estigis debaton kun distancaj vidpunktoj, kiuj tamen konverĝis al kompromisa solvo: nek recenzi nek ignori.
Kunlaboro inter la romanda kaj la Esperanta PEN, helpe ankaŭ de la kroata kaj la usona, sukcesis venigi persan poetinon al Svislando kiel rifuĝinton. Irano estas unu el la landoj kie oni plej persekutas virinojn nuntempe.
HeKo 821 2-C, 18 sep 23
Laŭ mendo de la proprietulo, kiu deziras vendi la nemoveblaĵon, fondumo Pro Esperanto (la “banko” de la Esperanta Civito) preparis projekton por valorigi la konstruon kiel Esperantan Gastodomon. Entreprenisto el zurika origino, la proprietulo esprimis grandan aprezon pri la projekto.
La alvenon de nova sezono estas ĉi-jare omaĝita per nova, bunta numero de “Literatura Foiro”, la 325a. La revuo, oficiala organo de Esperanta PEN-Centro, proponas al la legantoj dudek kontribuojn pri temoj plej diversaj: jen prozo, jen poezio, jen eseoj kaj recenzoj.
Ĝis 2013 kiu ajn svisa establo, eĉ sen jura personeco kaj pagante neniom, povis partopreni kun voĉrajto en la Asembleo de Kultura Centro Esperantista. Se ne svisa, necesis pagi la kvaroblon de la jara kotizo por Apoganto (180 frankojn oble kvar). Ĝenerale, nur LF-koop pagis.
La esperanta popolo, unuavice la establoj aliĝintaj al la Pakto, bezonas arkivistojn kaj bibliotekistojn. La Esperanta Civito subtenos projekton de Kultura Centro Esperantista por trejni katalogistojn kaj samtempe realigi la katalogon de la lerneja biblioteko de KCE. Tiucela staĝo okazos en la Esperanto-Domo dum du semajnoj, 13-27 aŭgusto 2024, sub la gvido de c-ano Ruben Fernandez.
La milito en Ukrajno baldaŭ atingos la sescentan tagon. Ankaŭ per sia daŭro ĝi similiĝas al tio kion Eŭropo spertis en iama Jugoslavio. La strategio de la rusa Putin plejparte ripetas tiun de la serba Miloseviĉ: la “granda Rusio” elvokas la fantomon de la “granda Serbio”. La reakiro de (parte) ruslingvaj teritorioj fare de Moskvo memorigas la ekspansion de Belgrado en Kroatio, Bosnio, Kosovo.
HeKo 820 7-C, 9 sep 23
La Kapitulo de la Esperanta Civito kunsidos en Ĉaŭdefono, 12 septembro 2023, kun telematikaj partoprenoj el Hispanio, Italio kaj Bulgario. Estas invititaj ambaŭ senataj grupestrinoj: pro ilia alesto eblos formaligi la kunvokon de la ordinara Parlamenta sesio en Budapeŝto, 20 majo 2024, koincide kun la sesa Danuba Esperanto-Rendevuo, laŭ invito de la paktinto Fajszi Amika Rondo.
“Ni sufiĉe multe antaŭenigis la diskuton pri AKSO, kaj kun la persisto de la nova Estraro, ni espereble atingos definitivan, reciproke interkonsenteblan solvon kun UEA, tamen des pli akcepteblan por TEJO, kiu fidele prilaboris la projekton dum pluraj jaroj” deklaris Albert S.
HeKo 820 5-C, 7 sep 23
Jam de kelkaj jaroj progresas en la malnova Esperantio la tendenco defendi multlingvismon en internaciaj institucioj. En tiu defendo esperanto ne estas menciata, tiel ke Ivo Lapenna plendus (se li vivus) ke UEA riskas proponi la lingvan problemon mem kiel solvon de la internacia lingva problemo. Lastatempe ankaŭ raŭmistoj okupiĝas pri la temo, sed kun alia taktiko.
Post apenaŭ unu jaro Albert S. Garrido lasis la prezidon de Tutmonda Esperantista Junulara Organizo, kaj entute la gvidajn organojn de la Junulara. Certe influis personaj kaj profesiaj engaĝoj, kiuj nun okupas lian tutan tempon. Profesie li estas instruisto pri la angla kiel (ĉies?) dua lingvo en Hispanio (perfekte por finvenkistoj…).
