decembro 2006

Karaj amikoj niĝeriaj,

Mi salutas vin okaze de la unua kongreso kiun vi partoprenas en Niĝerio, kaj mi esperas ke, post viaj spertoj, vi lernos kiel la temo de la kongreso sugestas memstariĝi kaj agi laŭplaĉe, sen la influo kaj diktado de eŭropaj imperialistoj, koloniigistoj ks, kiuj pensas erare ke ni daŭre estas infanoj.

Hodiaŭ estas la Tago de la Esperanta Kulturo, kiu koincidas kun la datreveno de la naskiĝo de Lazaro Ludoviko Zamenhof. En atmosfero de ĝojo, ne povas manki momento de malĝojo.

En naŭ urboj estas okazanta la skrutinio por la Senato de la Esperanta Civito: Angulemo, Buĵumburo, Ĉaŭdefono, Karakaso, Lomeo, Milano, Razgrado, Roterdamo, Varsovio.

Laŭ la indikoj alfluantaj el la unuaj tri balotejoj finintaj la skrutinion, pli ol 54% de la voĉrajtaj enskribitoj partoprenis en la elektoj: por Esperantio (sed ne nur) temas pri alta procento.

László Szilvási (persona non grata, ĉe la Esperanta Civito, pro diversaj kalumnioj kiujn li disvastigis pri ĝi) eksiĝis de Hungaria Esperanto-Asocio, kiu jam de unu jaro rezignis pri li kiel afergvidanto, kaj de naŭ monatoj kiel estrarano. La eksiĝo okazis post la hieraŭa ĝenerala Kunveno de HEA, kiu konfirmis la novan statuton de la asocio.

BALOTPROTOKOLO, 15 decembro 2006

Balotejoj: Angulemo, Buĵumburo, Ĉaŭdefono, Karakaso, Lomeo, Milano, Razgrado, Roterdamo, Varsovio.

Voĉrajtaj: 266 (ducent sesdek ses) / Balotis: 163 (cent sesdek tri) = 61,27%

Voĉoj validaj: 159 (cent kvindek nau, el kiuj sindetenaj: 6 / ses = 3,7%) / Nevalidaj: 4 (kvar) = 2,45%

Ĝis la alveno de la lasta balotprotokolo (el Burundio) la Blanka Listo montris surprize bonan reziston, tiel ke ĝi povis esperi tri senatajn postenojn. La rezulto lavange favora al la Verda Listo en Buĵumburo portis la “Novan Maldekstron” atingi du trionojn de la esprimitaj voĉoj.

Kiel eliranta respektive eniranta Konsuloj de la Esperanta Civito, ni elkore dankas la esperantan popolon pro la konfido kaj aprezo esprimitaj okaze de la ĵusa baloto. Duan, aparte varman dankon ni rezervas al kiuj (skrutiniantoj kaj Registrostabanoj) garantiis la regulecon de la baloto.

La antaŭlasta numero de “Heroldo de Esperanto” en la jaro 2006 atingis la abonantaron. En la unua paĝo, la ĉefartikolo (de Giorgio Silfer) estas dediĉita al la bulgara aktoro kaj reĝisoro Teo Jurukov, forpasinta fine de novembro. La frunta artikolo prezentas la projektojn de la Esperanta Civito por Afriko en 2007, fare de Chamberline Nguefack, Vickonsulino pri la Tria Mondo.

Kvardek tri kandidatoj el sep landoj trapasis la selektadon por partopreni en la perkoresponda kurso prepare al la dua Afrika Esperantologia Semajno (Buĵumburo, 28 decembro 2007 – 3 januaro 2008). Dudek sep estis akceptitaj, surbaze de la lingva nivelo (almenaŭ B-grado), de la ĝenerala klereco (almenaŭ abiturienteco) kaj de aliaj elementoj.