majo 2007

La Tria Mondo estas en la fokuso de la unua paĝo de la sesa ĉi-jara numero de “Heroldo de Esperanto”. Post intervenoj de sen. Chamberline Nguefack kaj de d-ro Probal Daŝgupta, la gazeto komparas la strategiojn de UEA kaj de la Esperanta Civito en la Tria Mondo. En interna paĝo aperas komentarioj de c-anoj Gbeglo Koffi, Prince Henry Oguinye, Antoine Kouablan kaj de s-ro Jean Codjo.

Dimanĉon la 27an de majo la itala EU-parlamentano Marco Cappato kaj liaj kunlaborantoj estis agresitaj en Moskvo fare de ultranaciisma grupo. La parlamentano de la Radikala Partio, konata pro sia agado favore al esperanto, estis iranta kun delegacio kiu, sen flagoj kaj aliaj eksteraj signoj, volis liveri leteron al la urbestro de Moskvo.

Virinoj en politiko – jen la ĉeftemo de la junia numero de “Femina”, kiu proponas buntan bukedon de artikoloj, eseoj, intervjuoj, atestoj pri aktivaj politikistinoj.