Danke al nerekandidatiĝoj kaj mortoj nur naŭ el dek kvin elirantaj membroj rekandidatas por la Akademio de Esperanto, okaze de la nuna renovigo de la triono, por la mandato 2013-2022. Inter ili estas tri virinoj: Perla Ari Martinelli, Marjorie Boulton, Anna Löwenstein; la ceteraj estas Michel Duc Goninaz, Carmel Mallia, Sergio Pokrovskij, Otto Prytz, Amri Wandel kaj John Wells.
La plej rimarkinda (ĉar tute silenta) estas la malapero de c-ano Koffi Gbeglo, la sola nigra afrikano en la Akademio de Esperanto dum la tuta historio de tiu institucio. Nun la sola lingva institucio, kie Afriko estas reprezentita, estas la Lingva Komitato de Esperantio (konstanta konsultejo de la Civitaj instancoj), kie sidas ne nur c-ano Gbeglo, sed ankaŭ la sekretario estas afrikano.
La novaj kandidatoj estas s-roj Marek Blahuŝ, Cho Chaoming, Rudolf Fischer, Edmund Grimley Evans, Harri Laine, Aleksander Melnikov, Ranganayakulu Potturu, Usui Hiroyuki, Tsvi Sadan, Nguyen Xuan Thu: neniu virino kaj neniu afrikano. Entute nur 19 kandidatoj por 17 postenoj. Inter ili, tri havas la esperantan civitanecon (estus kvar, se kun Gbeglo).
Aldonu komenton