Kvankam la decido ne estas ankoraŭ alprenita, la Abeletoj serioze konsideras alternativon por la festivalejo en aŭgusto 2022: la kampadejo de Ĉaŭdefono, kie eblas tendumi, sed ankaŭ bungalovi kaj loĝi en somerdometoj. Nur ĉi-lastaj gastigus kvardekon da personoj. Krome, la kampadejo proponas tute taŭgan restoracion.
La plejmulto de la 11a Kultura Esperanto-Festivalo disvolviĝus en la festosalono de la kampadejo, sed pluraj programeroj okazus diversloke en la urbo, ankaŭ lige kun vizitoj kaj ekskursoj: ekzemple la koncerto de Jean-Thierry von Bueren, kun fortepiano, situos en la muzika salono anekse al la framasona loĝio, tuj post la vizito kun escepta ĉiĉerono en tiu tre interesa monumento.
La ekskurso al Neŭŝatelo koincidus kun promenado tra la tiea samtempa festivalo de stratmuzikantoj, kie espereble ludos ankaŭ esperantlingva ensemblo. Plia ĉeesto en neesperantista medio estos la prezento de pupteatro (en esperanto) en Ĉaŭdefono.
La programo pli kaj pli riĉiĝas. Organizas la teamo de la Abeletoj, el Studenta Esperanta Ligo. KEF 2022 estos tute reala, ne virtuala surogato!
Aldonu komenton