HeKo 672 4-B, 15 feb 18
Sub la aŭspicio de Esperanta PEN-Centro la 44a literatura kafejo disvolviĝis hodiaŭ ĉe la legacio de la Esperanta Civito, zorge de Fajszi Amika Rondo. Gastis d-ro Vilmos Benczik, kiu per lumbildoj riĉigis prezenton pri Ferenc Szilágyi (pseŭdonime FerSil), okaze de la kvindeka datreveno de ties forpaso.
D-ro Benczik emfazis pri “Poemaro el Hungarlando” (1929) kaj “Trans la fabeloceano” (1932) ke ili enhavas felietonojn, ne novelojn. Ambaŭ verkojn eldonis Hungarlanda Esperanto-Societo.
Alia tre traktata verko estis “Dek du poetoj” (1934), kie situas ok poemoj de Szilágyi. La antologieton eldonis Literatura Mondo, kun kiu la svediĝonta hungaro kunlaboris, ĝis la definitiva elmigro norden.
Laŭ konkludo de la preleganto, Ferenc Szilágyi estis altkvalita ĵurnalisto, pli ol literaturisto. Tion plej atestus lia ĉefredaktado de “Norda Prismo” (1955-1967).
La sekva literatura kafejo okazos 22 marto 2018, samloke. Gastos József Horváth pri la germana klasikaĵo “Miĥaelo Kohlhaas” de Heinrich von Kleist, samtempulo de Goethe kaj Schiller.
Aldonu komenton