HeKo 473 5-C, 13 mar 11
Ĉi-semajnfine kunvenis por la dua kaj lasta fojo la komisiitoj de la Kapitulo, por prepari la kanvason de la leĝopropono celanta la starigon de la Esperanta Tempobanko, laŭ rezolucio aprobita de la lasta senata sesio.
La nova servo, kiu certagrade kunigas la ofertojn de la delegita reto (kreita en 1907 kiel “konsula reto”) kaj de la Pasporta Servo (kreita en 1967), prezentis kelkajn problemojn, sed la solvoj estas trovitaj.
Por utiligi la Esperantan Tempobankon ne necesos havi la esperantan civitanecon, sed ĉi-lasta estos oportuna diversgrade. La uzontoj devos aĉeti ĉeklibreton, kaj “pagos” la servojn per “horĉekoj”. Estos proponite, ekzemple, ke unu tranokto ĉe gastiganto valoras tri horojn; la gastiganto ricevos “horĉekon” kaj povos ĝiri ĝin al alia, por “pagi” alies servojn.
Laŭ la spirito de la tempobankoj, ĉiu servo havos ne profesian karakteron, sed tiun de volontula mutualeco.
Aldonu komenton