La revuo “Femina” brile kaj akurate finis sian kvinan jarkolekton, servante al sia kreskanta publiko menuon el frandindaj paĝoj pri la rilatoj inter korpo kaj menso, en la ĵus aperinta numero 20.
Klara respondas pri “Transsekse: ĉu ankaŭ pretervive?” Leen Deij eseas pri “Neniu seksa diferenco en la infana komunikado”. Etel Zavadlav perturbas per la rakonto “Lacego”. Miriam Altemani, profesie instruistino pri gimnastiko, en intervjuo farita de Giorgio Silfer klarigas sian moton “Por menso sana en korpo sana”.
Kelkaj elstaraj virinoj ricevis la atenton de niaj publicistinoj. Marie Schrøder en “Mistero pri verda kometo dana” fare de Perla Martinelli; Sophie Taeuber-Arp en “La sola virino sur la svisaj bankbiletoj” fare de Sonja Brun; Pearl Buck en “Sai Zhen Zhu: la ĉina popola rakontarto” fare de Perla Martinelli.
En la rubrikoj: Marcelle Dechamps finas sian interesan felietonon pri la fora nordo; Marie-France Conde Rey proponas mezepokan lulkanton; Lea Dorjheval kaj Leen Deij komentarias.
La revuon, sub la ĉefredaktado de sen. d-ino Perla Martinelli, posedas Feminisma Esperanta Movado, eldonas kaj administras LF-koop. Eblas peti provekzempleron ankaŭ tra nia redakcio.
Aldonu komenton