HeKo 411 8-A, 6 dec 09
En Hungario ĉiu gimnazio permesas la instruadon de esperanto, sed kiom da mezlernejoj realigas tion? Ja malpli ol la fingroj de unu mano: esence tio dependas de la ekzisto de taŭga instruisto.
Unu el tiuj ĉi kazoj situas en Bercel, departemento Nógrád (80 km nordoriente de Budapeŝto, ne for de la landlimo kun Slovakio), kie ekde la pasinta septembro la lingvo estas instruata en du klasoj, al entute dek ses gimnazianoj. La kursojn gvidas s-ino Ilona Sirkó, kiu ankaŭ iniciatis la titoligon de la lernejo al nia granda poeto Kálmán Kalocsay.
La instruistino estas aranĝonta ekspozicion, por kiu ŝi bonvenigas bildkartojn el la tuta mondo, ĉe la adreso: Kalocsay Kálmán Gimnázium, Eszperantó Diákköre, Széchenyi út 3, HU-2687 Bercel.
Aldonu komenton