Ĝis hodiaŭ dek naŭ ŝtatoj anoncis ke ili ne ĉeestos per sia reprezentanto la oficialan ceremonion de la Pac-Nobelo en Oslo. La premio estas ĉi-jare asignita al la fama ĉina disidento Liu Xiaobo.
Aldone al Popola Ĉinio, la bojkotontoj estas Afganio, Egiptio, Filipinoj, Irako, Irano, Kazaĥio, Kolombio, Kubo, Maroko, Pakistano, Rusio, Saudi-Arabio, Serbio, Sudano, Tunizio, Ukrainio, Venezuelo, Vjetnamio. Evidente la respektivaj registaroj opinias, ke Liu Xiaobo efektive estas krimulo. Li sidas en prizono kiel danĝerulo de sia ŝtato, post dekunujara kondamno.
Estas rimarkinda la sinteno de Afganio kaj Irako, sintonie al tiu de totalismaj reĝimoj. Se la okcidentanoj militis kaj militas tie por ke estu, interalie, respekto al la homaj rajtoj, la fiasko estas kompleta. Se ili volas demonstri, ke tiuj novaj registaroj estas politike sendependaj, utiligante kazon kiu ŝajnas diplomatie akcesora, ilia ciniko estas des pli granda.
Ankaŭ neniu parenco de la laŭreato rajtos iri al la ceremonio, sed ne pro libera decido. Liu Xiaobo estas verkisto aliĝinta al PEN Internacia.
Aldonu komenton