Pluraj A-gradaj kaj eĉ unu C-grada kurso jam okazis en la naturamika Esperanto-Domo, sed ĝis nun ĝi ne gastigis B-gradan lingvokurson: ekde oktobro tri personoj kompletigas sian preparon kaj strukture kaj kulture. Inter ili la plej brila estas c-ino Manuela Blanco.
La kurso artikiĝas en unu intensiva semajno kaj daŭrigaj horoj merkrede. Sub la gvido de c-ano Giorgio Silfer, ĝi eksperimentas metodon bazitan sur la kunrolado per la tekstoj de dramoj originale verkitaj en esperanto. Krom la ludo gravas la lingva profundiĝo kaj la interkulturaj demandoj.
Ricevas atenton ankaŭ la tipe esperantaj identigiloj: la simboloj (flago, himno ktp), la festotagoj, la salutkutimoj kaj tiel plu.
Laŭ sia kutimo, prof. Silfer instruas senpage, sed li mem decidas al kiuj instrui. “Se mi akceptus monon, mi ne povus rifuzi lernonton; kaj mi volas elekti la proprajn disĉiplojn” li klarigas kun rideto.
Aldonu komenton