KCE havos novan prezidanton
La Komitato de Kultura Centro Esperantista havos ordinaran kunvenon 18 aŭgusto 2011, laŭ kunvoko de sia prezidanto, sen. Perla Martinelli.
La Komitato interalie pritraktos la konsiston de la Komitato mem dum la mandato 2012-2014. Fakte c-ano Daniel Muhlemann anoncis sian retiriĝon el la Komitato entute, pro malsano, jam komence de 2011, dum sen. Martinelli anoncis sian rezignon pri la prezida posteno fine de junio 2011, pro transloĝiĝo ekster Svislandon. La Komitato ekzamenos do la kandidatiĝojn por la postenoj de prezidanto kaj sekretario. Siavice, sen. Dieter Rooke konfirmis sian disponeblon ree kandidati al la posteno de vicprezidanto.
En la tagordo elstaras ankaŭ la raporto de la regio Pro Esperanto, pri la planata restrukturado inter la domoj en Postiers 27 kaj 29, pri la reviziado de la mazuta cisterno kaj la eventuala transiro al novaj energifontoj, pri la transformoj en La Palumbejo (mansardo luata de LF-koop), pri la luonto de la apartamento Privata sur la unua etaĝo, pri la rezida rajto koncerne la Strigoneston, sur la dua etaĝo.
Inter la diversaj, la Komitato okupiĝos pri rilatoj inter KCE kaj afrikaj partneroj, kaj pri letero de Svisa Esperanto-Societo koncerne la ĝardenon de la Esperanto-Domo.
[HeKo 490 4-B, 12 aŭg 11]
