Heroldo-suplemento por niaj familioj
La septembra numero de "Heroldo de Esperanto" superos la tradician formaton de kvar A3-paĝoj: ĝi enhavos du pliajn paĝegojn, rezervitajn al nova, sesmonata suplemento. Temos pri "Gepatra Bulteno : por la esperanto-familioj".
Kiel paktinta establo, HdE aliĝas al la strebo de la Esperanta Civito proponi servojn al la denaskistoj, kiuj aparte suferas pro la pandemio: ekzemple la Renkontiĝo de Esperantistaj Familioj 2020 en Hungario estis prokrastita al la nuna monato, sed ĵus definitive nuligita.
"Unu el la celoj de la HdE-suplemento estas savi el la efemero, per oportuna preso, multajn interesajn artikolojn pri denaskismo el la sociaj retoj" komentarias sen. Manuela Blanco, vickonsulo pri socialaj aferoj.
[HeKo 767 5-B, 12 jul 21]