Fajszi Amika Rondo invitis la faman verkiston Julian Modest al telematika renkonto kun la (ne nur hungara) legantaro, 2 julio 2020 je 18h00, per skajpo.
La aŭtoro, vicprezidanto de Esperanta PEN-Centro, prezentos sian plej novan verkon: “La ĉasisto de sonĝoj”.
La delegito de Esperanta Naturamikaro ĉe la Jara Konferenco de Naturamika Internacio, c-ano Giorgio Silfer, renkontis ĉi-semajne la prezidanton de la itala naturamika federacio, s-ro Christian Facchetti, por analizo de la situacio en la naturamika movado, trafita kiel multaj de la pandemia konjukturo, kiu kaŭzis la virtualigon de la konferenco mem, kaj la nuligon de jubileaj aranĝoj.
“Konsentite kun la respondeculoj de prezidantaro de la Hungaria Esperanto-Asocio (HEA), ni ŝatus kontaktiĝi kun Vi (…) por ke ni povu kandidatigi Vin kiel prezidanton de HEA. Post kiam Vi akceptos la kandidatigon, ĝi estos proponita al la Asembleo de HEA.
HeKo 737 6-C, 20 jun 20
La Kapitulo de la Esperanta Civito skajpe kunsidis 17 junio 20, laŭ ordinara monata kunveno, sub la prezido de la Konsulo, sen. Riichi Karibe. Partoprenis la tuta Kapitulo, escepte de la Unua Vickonsulo, sen. Julio Herrero, trud-izolita ie en la andaluza kamparo: Hispanio ŝajnas la lando kun plej multaj restriktoj al la persona movlibero, en Eŭropo.
“La buĝeto 2019 antaŭvidis deficiton de preskaŭ 141.000 eŭroj, sed jam eblas diri, ke la fina rezulto estis signife pli bona”, anoncas la estrara raporto pri la pasintjara agado de la Universala. La malpli negativan rezulton kaŭzis ŝparoj “ĉe oficistaro, oficeja domo, la revuoj”.
HeKo 737 4-C, 17 jun 20
Daŭras la senatokonsulto pri la pandemia konjunkturo kaj ĝiaj efikoj en Esperantio, surbaze de rezolucio proponita de la Konsulo, sen. Riichi Karibe.
HeKo 737 3-C, 15 jun 20
Sen. Riichi Karibe, Konsulo de la Esperanta Civito, vokis hieraŭ al senatokonsulto pri la pandemia konjunkturo en Esperantio, konforme al la art. 28 de la Senata Reglamento. Senatokonsulto estas telematika kunsido de la Senato, pri unu sola kaj klare indikita temo. La Konsulo enkondukas la diskuton, fiksas la limdaton por la sinesprimoj kaj eltiras la konkludojn.
La redakcio de “Literatura Foiro” kunvenis hodiaŭ vespere por finredakti la enhavon de la aŭgusta numero (306), en skajpa alesto de ĉiuj redaktoroj (gec-anoj Marie-France Conde Rey, Carlo Minnaja, Fernando Pita, Giorgio Silfer), sub la kunordigo de c-ino Perla Martinelli.
HeKo 737 1-C, 10 jun 20
La Kapitulo estas kunvokita al ordinara skajpa kunveno, 17 junio 2020 je 10h00 (MET), sub la prezido de la Konsulo, sen. Riichi Karibe.
En la tagordo elstaras la eksteraj rilatoj kaj diversaj projektoj. Specife moviĝas la formado de kadroj, la propono pri sidejo de Islama Esperanta Klubo en Buĵumburo, la smeralda jubileo de la Manifesto de Raŭmo, la regia aktiveco de Pro Esperanto.
Sennacieca Asocio Tutmonda ne profitis el sia lastjara kongreso en Barcelono, duoble pli partoprenita ol kutime: la membraro malkreskis je pli ol dek procentoj, de 446 en 2018 al 400 en 2019. La kotizaro fidele spegulas tiun konstantan regreson: 19.000 eŭroj en 2017, 16.000 en 2018, malpli ol 14.000 en 2019.
“Heroldo de Esperanto” n-ro 2309 (junio 2020) estas en la leterkesto de siaj abonantoj, kun interesaj kontribuoj al diversaj debatoj: pri financoj en Esperantio, pri raŭmismo, pri indiĝenaj lingvoj, pri onomastiko. Aldone multaj informoj el la esperanta mondo, precipe la konsorcio de la Pakto.
Post la rezigno de britoj respektive sudkoreoj, Tutmonda Esperantista Junulara Organizo lanĉas trian alvokon por la okazigo de sia kongreso. Sed el la kvar kandidatoj kiuj pretis inviti IJK-on 2021, post la maltrafa elekto favora al pacifika insuleto reproponus sin nur unu, kaj ĝi ne estas la svisa.
