Nia lingvo alestas la 52an internacian renkonton de Asocio de LingvoTestistoj en Eŭropo, danke al Kultura Centro Esperantista, reprezentata de gec-anoj Lorena Bellotti kaj Giorgio Silfer. Temas interalie pri la debuto de nova stabano de la Esperanta Civito.

Post momento da eŭforio, la eŭropaj borsoj redimensiigis la percepton pri la ĵusa malneto de akordo inter Bruselo kaj Londono rilate la britan secesion el Eŭropa Unio. Tamen restas la fakto ke Britio riskas ĉiutage pli grandan perdon en ĉi tiu intertraktado, interalie ĉar la tempo laboras kontraŭ la insulo.

Sten Johansson, aŭtoro de “leĝeraj romanoj”, estas konata en la sveda Esperantio pro sia mizantropeco. Lia acideco tralikas el la respondoj al ĵusa intervjuo de Pawel Fischer-Kotowski, legebla en “La Balta Ondo”, kie li ŝajnas pontifiki. Interalie li sin esprimis pri la literatura Nobel-premio.

Laŭ komisio de la Esperanta Civito, Kultura Centro Esperantista en Svislando finis la selektadon de la partoprenontoj en la 5a Afrika Esperantologia Semajno, kiu disvolviĝos en Buĵumburo 28 decembro 2018 — 3 januaro 2019. Eventualaj modifoj en la listo dependos ekskluzive de la gvidontoj de la seminario, gec-anoj Perla Martinelli kaj Giorgio Silfer.

Andaluzio, Asturio, Katalunio en la agadplano de Esperanta Naturamikaro dum la (eĉ tuja) estonteco. Ĉi-monate delegacio de ENa renkontos la partneran institucion en Asturio, por prepari la partoprenon en projekto financata de Eŭropa Unio.

Dua speso estas pregota en 2019, honore al la 50a jarkolekto de “Literatura Foiro”. Temos pri medalo el arĝento (999) samgranda kaj samvalora kiel la unua, dediĉita en 2009 al la 150a datreveno de la naskiĝo de Zamenhof. La emisio okazos tra fondumo Pro Esperanto, nome la Civita banko, kaj ĝin realigos meksika juvelisto, c-ano Manuel Nájera.

En 1932 ĉesis la dekjara valideco de la Interkonsento de Helsingforso, laŭ kiu la du tendencoj de la neŭtrala (laŭ SAT: burĝa) esperanto-movado kreis komunan Internacian Centran Komitaton.

Kooperativo de Literatura Foiro estas preparanta novan kompaktan diskon, per la voĉoj de Federica D’Antonino (soprano) kaj Gaetano Merone (tenoro), kiuj debutis en Esperantio dum la lasta Internacia Junulara Festivalo en Suda Italio.

Tazio Carlevaro, Carlo Minnaja, Nicolino Rossi kaj Giorgio Silfer, kune kun kunlaborantoj/intoj, abonantoj kaj invititoj, festos en Bolonjo sabaton 11 majo 2019 la 50an datrevenon de la fondo de la itala literatura rondo “La Patrolo” kaj la 50an jarkolekton de “Literatura Foiro”. La eventon kunorganizas la Esperanto-grupo de Bolonjo “Achille Tellini 1912”, prezidata de Ivan Orsini.

Kooperativo de Literatura Foiro responsis pri la eldonado de “Heroldo de Esperanto” ĝis la fino de la 92a jarkolekto (decembro 2016).

Pri la 93a jarkolekto (2017) responsas la entrepreno Lexus en Brazilo. Ĝi promesis al siaj klientoj dek du numerojn. Aperis tamen ses rete, el kiuj nur tri ankaŭ papere. Ĝiaj blogo kaj Facebook-paĝo ne aktualiĝas jam de pluraj monatoj.

La Konsulo vojaĝos al Afriko meze de decembro 2018 kaj tie restos dum tri semajnoj, zorgante pri diversaj projektoj, interalie: a) la klerigo de Civitaj kadroj en la regiono de la grandaj lagoj; b) la starigo de la unua esperanto-teatro en Afriko; c) la efektivigo de la Tanganika Esperanto-Domo. Krome li prezidos parlamentan sesion de la Esperanta Civito.