La 5a Lingva Kolokvo de Kultura Centro Esperantista, okazanta en Ĉaŭdefono, revenis al sia origina formulo de renkonto inter Lingvaj Komitatanoj de Esperantio (komisiono interna al la Esperanta Civito) kaj Akademianoj de Esperanto.
Ankaŭ ĉi-jare Esperantista Domo de Kulturo “D-ro Ivan Kirĉev” anoncas la internacian literaturan konkurson ABRITUS, por originala esperanta poezio kaj humuro, sub la aŭspicio de la fama revuo “Literatura Foiro”.
Kooperativo de Literatura Foiro anoncas pozitivan bilancon pri 2018. Rimarkindaj estas la vigleco de la librofako, per la du titoloj “Historio de la esperanta literaturo” kaj “Paŝoj al plena posedo”; la releviĝo de la diskofako, kun tri projektoj realigataj; kaj la fortiĝo de “Literatura Foiro”, kiel produkto kaj kiel abonantaro.
La jaro 2018a alportis al Kultura Centro Esperantista sukcesojn kaj atingojn, sed la financa situacio restas fragila: apud bela kapitalo (la domo kaj la parcelo, kun asekuro kontraŭ incendio por pli ol okcent mil frankoj) preskaŭ mankas kontanto.
Ankaŭ por Universala Esperanto-Asocio sonis la horo de la drasta decido: eliri el la nigra truo de sia konstanta deficito, reduktante la kostojn de la burokrata aparato.
La indiko pri Eŭropa Unio malaperis de la britaj pasportoj eldonataj ekde la 30a de marto, la tago post la planita eliro el EU. La koloro restis la bordoza, sed estas planata la reveno al la mara bluo de la antaŭa jarcento.
HeKo 706 2-C, 6 apr 19
La 4an de aprilo post longa malsano forpasis la 67-jara Imre Szabó, tre aktiva multflanka Esperantiano, iam funkciulo de Hungara Esperanto-Asocio, ekde 2008 prezidanto de Hungaria Esperanto-Asocio. Profesie eldonisto, li nomis sian presejon “Saluton”.
La Pac-Komitato de PEN Internacia aprobis hodiaŭ en Bledo la tekston de nefermita letero al la EU-civitanoj, kiu invitas ilin al partopreno en la baloto la 26an de majo. Al la invito aldoniĝas la sekvaj frazoj:
Antaŭ du tagoj d-ro Mark Fettes, prezidanto de Universala Esperanto-Asocio, konfirmis per cirkulero al la Komitato ke la jara deficito de la asocio en 2019 tanĝos cent kvardek mil eŭrojn, do iom malpli ol kvaronon de la deklarita financa kapitalo. Laŭ tiu tendenco, en 2022 UEA ne plu havos kapitalon en moveblaĵoj, kaj devos ekvendi la domon aŭ la apartamenton en Roterdamo.
La internacian PEN-komitaton de la verkistoj por paco ne plu prezidas sloveno. Dum duona jarcento la Slovena PEN organizis la konferencon en Bledo, kie kunvenas ankaŭ la pac-komitato, kaj lastatempe eĉ la verkistina. Kvankam la renkontoj plu daŭros en Bledo, la komitaton prezidos franca verkisto, Emmanuel Pierrat, ĵus elektita fine de la mandato de Marjan Strojan.
Nicolino Rossi, sanmarina civitano loĝanta apud Napolo de jardekoj, hodiaŭ finas okdek jarojn.
Plurfoja premiito (kaj poste juĝanto) en la Belartaj Konkursoj de UEA kaj en aliaj konkursoj. Premio “La Verko de la Jaro 1980” pro la poemaro “Sur la vivopado”. Unua estro de la literatura rondo “La Patrolo” (1969-1974).
La ĉeftemo de la ĉi-jara Internacia Junulara Festivalo (Rimino, 18-22 aprilo) rilatas al sankteco. Enkonduke demandas Valentina Boldurescu: “Kiu povus paroli pri la temo?” Respondis tri kleruloj, kunlaborintoj de “Homarane”, kajero pri socio, filozofio kaj religio: Francisko Degoul, Vinko Oŝlak, Giorgio Silfer.
