Per sia hieraŭa kultura renkonto la Esperanto-Domo de Malago inaŭguris novan metodon prezenti nian literaturon, kiu kombinas prelegon, filmon kaj deklamadon.

En la fokuso situis la ĉefverko de Adam Mickiewicz “Sinjoro Tadeo”, tradukita de Antoni Grabowski: unu el la esencaj tekstoj por nia literaturo, ĉar la plej grava poezia traduko dum la unua periodo (1887-1921).

La Kapitulo de la Esperanta Civito, kunlabore kun paktintaj establoj, subtenas ĉi-jare du kursojn por la formado de kadroj, en Eŭropo kaj Afriko. La unua disvolviĝos ĉe la Esperanto-Domo de KCE en Svislando, 23-28 julio 2017. La dua estas planata en Burundio fine de la jaro. Tiel prezentas siajn lecionojn la tri kursogvidantoj en Ĉaŭdefono.

Ekzistas alia desegna varianto por “Albaniva kaj ŝiaj sep nanoj”, la unua kamiŝibaja fabelo originale en esperanto, verkita de Giorgio Silfer en januaro 2013. La desegnojn realigis milana pentristino, Alda Vercesi, kunstudentino de la aŭtoro.

La 14an de julio 2017 la Administra Komitato de LF-koop havos ordinaran kunvenon en Svislando, sub la prezido de c-ino Perla Martinelli, laŭ ĵusa kunvoko. En la tagordo precipe la aktiveco de la Gazetfako kaj de la Librofako.

“Historio de la esperanta literaturo” vendiĝas pli rapide ol la aŭtoroj pretas por la dua eldono. Tial Kooperativo de Literatura Foiro decidis, dum ĵusa kunveno en Italio de la aŭtoroj kun la prezidanto, tuj produkti la trian represon de la unua eldono.

Planite kiel simpozio, pro la silento aŭ nedisponeblo de diversaj prelegontoj la aranĝo pri homaranismo dum la Baltiaj Esperanto-Tagoj en Leipaja (1-4 julio 2017) reformuliĝis kiel seminario, kies ĉefpreleganto estos prof. Giorgio Silfer, unu el la plej aktivaj zamenhofologoj.

Civila Esperanta Servo komisiis c-anon Tihomir Lovriĉ partopreni en la misio organizata de la itala naturamikaro en Bosnio, meze de junio 2017.

La mision, kun prospektora kaj turisma celoj, gvidas la prezidanto de la itala naturamikaro, Christian Facchetti.

(HeKo 644 5-C, 11 maj 17)

La Civita “banko” estas preparanta studan tagon en Bruselo, ĉe la okcidenta legacio, je la 23a de septembro 2017, sub la prezido de sen. Marie-France Conde Rey, vickonsulo pri financoj kaj prezidanto de Pro Esperanto.

La ĉefa gasto de la aranĝo estos d-ro Rolando Meerbergen, fakulo pri investado en Afriko. Li prelegos en la franca, kun postinterpretado al esperanto.

La 4an de majo 2017 Dalai Lama renkontis la prezidantinon kaj la ĝeneralan sekretarion de PEN Internacia, Jennifer Clement respektive Carles Torner. Lia sankta moŝto montris sin tre kontenta pro la konstanta apogo de PEN Internacia al la tibetaj aŭtoroj, aldonante ke defendi la tibetan popolon signifas defendi la homajn rajtojn.

Komence de majo 2016 la UEA-membraro sume superis kvar mil, sed ĉi-jare ĝi restis sub 3.800, kun pli ol 7% minuso. “La ciferoj estas eĉ pli maltrankviligaj ol mi timis” komentariis la svisa UEA-komitatano Dietrich Weidmann, leginte la interan raporton pri la stato de la membraro.

“Mi ĉiam dubas, ĉu paroli la anglan aŭ la francan, sed mi faris mian elekton. Mi prezentos mian paroladon en la franca, ĉar malrapide sed konstante la angla perdas sian gravecon.”

Plenplena salono de Bolonja Esperanto-Grupo hieraŭ vespere, kiam prelegis la Vickonsulo de la Esperanta Civito, prof. Giorgio Silfer, post enkonduko de la loka prezidanto Ivan Orsini. La temo estis: “La brita secesio: kiuj sekvoj en la lingva reĝimo de Eŭropa Unio?”