Pli svisa ol kutime estas la lasta numero de “Literatura Foiro” (240, aŭgusto 2009), sur la ondo de la aligo de Ĉaŭdefono (kaj Loklo) al la monda kultura heredaĵo, laŭ freŝa decido de Unesko.
“Kontakto”, la socikultura revuo de Tutmonda Esperantista Junular-Organizo, atingis malfruon de preskaŭ tuta jaro: dua rekordo post tiu akumulita de Simo Milojeviĉ en 1973-75. Laŭdinde en malpli ol du monatoj la nunaj redaktoroj, Paŭlo Moĵajev kaj Federico Faccio Peláez, produktis tri numerojn, kaj “Kontakto” preskaŭ akuratiĝis.
Ĵus okazis la 94a Universala Kongreso en Bjalistoko (Pollando). La kongresa libro montras, ke sep afrikanoj aliĝis: c-ano Privas Tchipke, s-ro Jérémie Sabiyumva, c-ano Koffi Gbeglo, s-ro Jean Codjo, s-ro Joseph (rifuĝinto el Kongolando, kiu tra Sud-Afriko atingis Pollandon, kie li vivas), s-ino Justine Ralalarisoa kaj ŝia filino Ando Fenoaina Randriarimanana.
En decembro 2009 okazos kursoj kaj ekzamenoj zorge de Tietti-Instituto de Esperanto en Togolando (TIETo).
Ken Miner publike plendis, ke “Tro ofte oni fordifinas min mem kaj sendube aliulojn el Raŭmismo, tro ligante tutan Raŭmismon al la agadoj de la [Esperanta] Civito. Pli precizaj terminoj ja ekzistas (ekz. “vivtenismo”), sed ili tro malofte uziĝas por difini en konciza vortaro.
C-ano Manuel de Seabra dankis la prezidanton de la Esperanta PEN-Centro pro la atribuo de la premio “La Verko de la Jaro 2008” al sia romano “Ĉu vi konas Blaise Cendrars?”.
HeKo 400 7-C, 23 aug 09
Aktivuloj de la Nova Maldekstro, kiuj en la Esperanta Civito formas la politikan platformon de la Verda Listo, gastis ĉe c-ino Anne Marcanti en Ĉaŭdefono, por interna kunveno preparita de interreta diskuto. Interalie ĉeestis la nuna Konsulo kaj la eksa Konsulo, kaj kelkaj geparlamentanoj.
Interesa prelego de la plej longe vojaĝinta partopreninto al la ĵusa Simpozio pri Homaranismo, c-ano Aleksandro Melnikov el Rostovo (Rusio), hodiaŭ ĉe Kultura Centro Esperantista en Ĉaŭdefono.
La lasta tago de la Simpozio pri Homaranismo en Ĉaŭdefono konsistis el du programeroj: la forumo pri la perspektivoj de homaranismo kaj la konsultiĝo pri la naskota revuo “Homarane”.
La hodiaŭa tago de la Simpozio pri Homaranismo okazanta en Ĉaŭdefono estis dediĉita al la rilatoj inter homaranismo kaj framasonismo, ebligante certan enfokusigon pri la pensaro de Lazaro Ludoviko Zamenhof.
Dum la tria tago, la Simpozio pri Homaranismo okazanta en Ĉaŭdefono adresis sian atenton precipe al la rilatoj inter homaranismo kaj aliaj religioj.
La dua tago de la Simpozio pri Homaranismo, okazanta en Ĉaŭdefono, havis kiel ĉeftemon la rilatojn inter homaranismo kaj cionismo.
Tiurilate konfrontiĝis du diverĝaj tezoj: tiu de c-ano Raymond Brisebois, kunordiganto de Hilelista Esperanto-Komunumo, kaj tiu de Edmond Privat, pritraktita en longa esplora studo de sen. Perla Martinelli.
