La lerneja jaro 2007-08 finiĝas en Togolando, kaj la 18a de julio estos la lasta tago. La 14an de julio jam kolektiĝas amaso da gelernantoj kaj gepatroj en Institut Zamenhof (proprieto de TIETo, aliĝinta al la Pakto) por peti lokon por la lerneja jaro 2008-09.
“Heroldo de Esperanto” estas la gazeto kiu plej frue raportis pri la tutmonda ĵurnalista kongreso en Vilno kaj la tieaj renkontoj. Ankaŭ la unua kiu aperigas la tutan tekston de kongresa prelego: ĝuste tiu de la kunredaktorino, Aneto Muhlemann, la unua denaskulino kiu akiris la esperantan civitanecon.
Plezure mi invitas vin partopreni la 34an Katalunan Kongreson de Esperanto, okazontan en Sabadell la 6an, 7an kaj 8an de decembro 2008.
HeKo 359 2-C, 20 jun 08
La irlanda popolo decidis per referendumo ne ratifi la Traktaton de Lisbono, kiu estas la lasta ĝisdatigo de la konstitucia platformo de Eŭropa Unio. Malgraŭ alarmaj voĉoj de kristandemokratoj, socialdemokratoj kaj aliaj, spite al la vivuoj de naciistoj kaj klasbatalaj ruĝuloj, tiu nea baloto povas esti tute seninflua.
La interna referendumo de Esperantlingva Verkista Asocio vidis la partoprenon de 34 membroj el 62 (54,8%).
“Violeto ne volas violenton” estas la ĉeftemo sur la kovrilo, ankaŭ precipe violkolora, de la junia numero de “Femina”, ĉefredaktata de sen. Perla Martinelli, kaj organo de Feminisma Esperanta Movado, prezidata de sen. Marie-France Conde Rey, Vickonsulo de la Esperanta Civito.
HeKo 359 5-C, 23 jun 08
Hodiaŭ la retejo de la nova Esperantio atingis la ducentmilan viziton. Por la unuaj cent mil necesis 364 tagoj, por la duaj nur 236 tagoj. Dum la lastaj tri monatoj la retejo spertis rimarkindan kreskon de la vizitoj, kiuj probable superos stabile la nombron de 15.000 monate. Bonvenon al www.esperantio.net !
C-ano Lennart Svensson, respondeculo ĉe la gastejo kaj lernocentro Esperanto-Gården en Lesjöfors (Svedio), akceptis en parte privata parte oficiala vizito la Konsulon de la Esperanta Civito, kune kun sen. Bertil Nilsson, vickonsulo pri edukado, kaj sen. Perla Martinelli.
Eksterordinara renkonto de intelektuloj el la sveda Esperantio, okaze de la vizito de la Konsulo hieraŭ vespere en la Esperanto-Centro de Stokholmo. Ĉeestis interalie Jarl Hammarberg, Christer Kiselman, Bertil Nilsson, Leif Gunnar Nordenstorm, Marianne Ståhlberg, kaj gravaj svedaj aktivulinoj, kiaj Kajsa Hansen kaj Ulla Luin.
