“La Papo deziras Bonan Kristnaskon al la esperantlingvaj pilgrimuloj” legeblis sur la televida ekrano hodiaŭ tagmeze, kiam ene de sesdek kvin lingvoj, inter la samoa kaj la gvarania, Benedikto XVI bondeziris “Dibenitan Kristnaskon kaj prosperan novjaron!”.
Ne nur per la lumoj de la kristnaska arbo, decembro brilas ankaŭ per “Literatura Foiro”. La numero 248 fermis la 41an jarkolekton de la plej longe senĉese aperanta kultura revuo en nia lingvo. En la jaro 2010 la plenkoloraj kovriloj prezentis pentraĵojn de legantaj virinoj; en la decembra numero la bildo (pentrita en 1882) estas el la peniko de Michael Anker (1849-1927).
Per la publikigo de la 15a kaj 16a numeroj (2164 kaj 2165) praktike plenumiĝis la 86a jarkolekto de “Heroldo de Esperanto”. Mankas nur la ekstra 17a numero, tute dediĉita al Afriko, redaktota post la januaraj vojaĝoj de du redakcianoj al afrikaj landoj (Benino, Burundio, Ganao, Togolando). El tiuj 86 kolektoj, Teo Jung produktis 37, ges-roj Fighiera-Sikorska produktis 35, LF-koop eldonis 14.
La 18a Togolanda Esperanto-Kongreso okazis en la urbeto Vogan 24-27 decembro 2010. La temo estis la “Ŝafaro harmonia”, kiun mi enkondukis rakontante pri miaj unuaj jaroj en alia kolonio “Nederlandsch Indie” (nun Indonezio) kaj la jaroj en japanaj militkoncentrejoj. La tiamaj lupoj nun ne plu estas lupoj, sed aliaj lupoj povas aperi.
HeKo 465 9-C, 29 dec 10
Sekve de invito el sia parlamenta grupo, sen. Marie-France Conde Rey akceptis la proponon esti la kandidato numero 1 de la Verda Listo en la elektoj por la Senato fine de 2011. Ŝi tamen metis kondiĉon, kies plenumon konsideros la koncerna KoKuSo (Komitato Kunordiga kaj Subtena) fine de septembro.
La kalembura frazo kiu karakterizas la belan, buntan kovropaĝon de “Femina” n-ro 24 (vintro 2010) aludas al la fakto, ke virino ne bezonu alpreni rolon kiu plaĉas al viroj, por efektive plaĉi al ili, des pli kiam tiu rolo estas socie altrudita kaj devigas ŝin rezigni pri parto de sia personeco.
HeKo 466 2-C, 31 dec 10
Karaj gecivitanoj,
Koran dankon pro la bondeziraj mesaĝoj rilate mian farton: kiel vi vidas, mi reprenas hodiaŭ la konsulan oficon, post mallonga anstataŭo fare de la Vickonsulo.
