Ĉi-jare la Tagon de la Esperanta Kulturo festos Esperanta Naturamikaro la 14an de decembro kaj Kultura Centro Esperantista la 15an de decembro, en la naturamika Esperanto-Domo de Malago respektive la helvetia Esperanto-Domo de Ĉaŭdefono.
La malaga festo ekos je la 17h00, dum la ĉaŭdefona je la 19h30: teo kaj biskvitoj en la unua kazo, fonduo kun neŭŝatela vino en la dua, agrabla babilo pri la kulturaj atingoj de Esperantio en ambaŭ, danke al gec-anoj Carlos Spinola kaj Manuela Blanco en la unua, gec-anoj Perla Martinelli kaj Alessio Giordano en la dua.
Okazos telematika saluto inter ambaŭ domoj, kaj ankaŭ kun la geamikoj kiuj okupiĝas pri la Tanganika kaj pri la Skandinava Esperanto-Domoj. Sen. Blanco resumos sian prezenton pri ENa kaj sen. Giordano la sian en la ĵusa virtuala kongreso de la Universala.
La portreto de Zamenhof en la afiŝoj de ambaŭ festoj estis desegnita de sen. Tihomir Lovriĉ, la valora ilustristo de la komiksa albumo “Esperantio vivas”, verkita de Nicolas Vanof.
Aldonu komenton