La Asembleo de Kultura Centro Esperantista (KCE), kunsidante en Ĉaŭdefono la 9an de novembro 2013,
memorante
> ke ges-roj Dieter Rooke kaj Jun Liu luas favorpreze laŭ regula kontrakto la meblitan apartamenton „Privata” ĉe la Esperanto-Domo, kies proprietulo estas KCE;
> ke KCE ĝustatempe komunikis la ĉeson de la provizora klaŭzo, atribuanta al la luanto la oficon de rekompencata „concierge” (domestro), ekde la 1a de septembro 2013;
konstatinte
> ke la geluantoj ne redonis la universalan ŝlosilon, malgraŭ letero de la advokato de KCE, devigante la proprietulon aldoni du novajn serurojn al la pordoj de la kontoroj;
> ke la geluantoj ne pagis la tutan luon de la monato aŭgusto 2013, malgraŭ ne laboro de la domestro;
emfazante
> ke la luanto molestis KCE-volontulojn, per koruptopropono kaj per minacoj;
> ke la luanto ne respektis la limojn de sia domicilo, kaj eĉ agresis KCE-komitataninon;
> ke la geluantoj disvastigas kalumniojn pri KCE;
> ke la reteno de la universala ŝlosilo, kaŭzanta zorgemon pro eventuala ĝeno al aliaj luantoj kaj riskon al la reteninto mem en kazo de ŝtelo, estas delikto laŭ la svisa kodo;
ordonas
al la Komitato de KCE:
> deloĝigi ambaŭ geluantojn kiel eble plej baldaŭ, konforme al la svisaj normoj;
> reteni el la garantia depono de la geluantoj la sumon de tricent CHF monate ekde la lupago fine de aŭgusto 2013;
> reteni el la garantia depono ĉiun koston pro la advokato kaj la seruroj/ŝlosiloj.
Unua subskribinto: prof. d-ro hab. Walter Zelazny, voĉrajta kunvokito
NOTO DE LA REDAKCIO:
La problemoj kun domestroj estas ordinara ĉiutagaĵo en la socio. Lastatempe Kastelo Greziljono havis eĉ pli akran problemon kun sia luanto/prizorganto. La afero tiel malbone evoluis, ke la asembleo de la kooperativo posedanta la kastelon estis vokita aprobi la eksigon de tiu persono el la societo mem.
Aldonu komenton