HeKo 546 1-C, 30 nov 13
Dum sia vojaĝo al Burundio (15-23 novembro 2013), la Konsulo kunportis plurajn ekzemplerojn de Plena Ilustrita Vortaro de Gaston Waringhien, parto de la stoko kiun la Esperanta Civito aĉetis de SAT por helpi tiun asocion en malfacila financa momento. La ekzempleroj estis donacitaj kun la celo plifortigi la rimedojn je la dispono de la multnombraj esperanto-instruantoj.
La vortaro prioritate atingis diversajn lernejojn: Afrika Liceo, Muhuta Liceo, Universitato de Grandaj Lagoj, Universitato Rohero, en la Buĵumbura distrikto, kaj la mezlernejo de Gasanda, en la provinco de Bururi. Kelkaj iris al aliaj instruantoj kiuj agadas en pluraj lokoj, kiel c-anoj Eric Nsengiyumva kaj Pascal Niyondiko. Du iris al lokaj kluboj : tiu de Uvira en Kongolando, kaj tiu de Njanza-Lago en la provinco de Makamba, la urbeto kie la paktinta establo Societo Internacia por Paco Universala (SIPU) planas konstrui la Vilaĝon de Paco.
Neniel tiuj centroj produktantaj amasojn da esperantistoj povus akiri tian materialon sen la decido de la Esperanta Civito. Ili ricevis ĝin kun dankemo, respekto kaj granda intereso.
Aldonu komenton