HeKo 593 9-B, 21 feb 16
La Dudekunua de Februaro estas la Internacia Tago de la Gepatra Lingvo: tiel en esperanto, dum la plejmulto parolas pri patrina lingvo, kvankam ne mankas esceptoj pri patra lingvo, kiel la pola. PEN Internacia celebras ĝin kun la celo propulsi la lingvan kaj kulturan diversecon, kaj plurlingvismon ĉe la individuoj, kio estas alio ol multlingvismo ĉe la supernaciaj institucioj.
Ĉi-jare PEN Internacia emfazas la kazon de eritrea verkisto, Idris Said Aba Arre. Li multe skribis pri la eduka politiko en la gepatra lingvo en Eritreo post la sendependiĝo. Li estis retenita en sia hejmo en 2001 kaj ne rajtis komuniki, sen akuzo kaj juĝo ekde tiam. Kelkajn monatojn antaŭ sia malliberigo li publikigis influan verkon pri la gepatre-lingva edukado, per kiu li kritikis la lingvopolitikon de la tiama registaro.
Samtempe PEN Internacia dum la hodiaŭa tago sustrekas la engaĝon de la civila socio favore al la gepatre-lingva edukado, fare de la PEN-centroj afrikansa, malavia, filipina, sudafrika, kimra kaj zambia.
PEN Internacia estas la sola NRO en A-rilatoj kun Unesko kie ankaŭ esperanto estas reprezentata, danke al la PEN-centro nuntempe prezidata de c-ano Bertil Nilsson, aliĝinta al la Pakto por la Esperanta Civito.
Aldonu komenton