Strategia deklaro de Afrika Esperanto-Instituto

Afrika Esperanto-Instituto, aliĝinta al la Pakto por la Esperanta Civito, diskonigas sian Strategian Deklaron ĝuste hodiaŭ, en la Tago de la Pakto:

VIZIO

• Arigi ĉirkaŭ ni la celkonscian afrikan esperantistaron.
• Krei novajn sinergiojn kaj stimuli la kunlaboron inter afrikaj esperanto-kleruloj.
• Konstrui kadran strukturon taŭgan por disvolvi la kompetentojn de la afrika esperanto-inteligencio.

MISIOJ

• Transporto kaj distribuo de didaktikaj varoj kaj fakaj kompetentoj de Eŭropo al Afriko.
• Formado de esperanto-aktivuloj kaj specife esperantologoj.
• Esplorado pri la kulturaj kontribuoj eblaj el Afriko.
• Servado al orientita kaj selektita klientaro.
• Dokumentado pri la historio de la afrika Esperantio.

VALOROJ

• Motivita engaĝo: investi sin en la AEI-misioj kun energio kaj profesieca konscio.
• Kvalito: partopreni en la solvo de mankoj kaj misfunkcioj.
• Komunikado: aŭskulti, partumi, transdoni informojn, kaj zorgi pri ilia kompreno.
• Kooperado: labori en spirito interhelpa, valorigante la reciprokan konfidon.
• Iniciatemo: engaĝi sian respondecon per la alpreno de decidoj kaj ties plenumo.
• Respekto, lojaleco, honesteco: sin adresi respekteme al la alparolato, doni pruvon de fidindeco kaj konstanto pri kio ni estas kaj kion ni faras.
• Efiko: ni estas efikaj kaj uzas resursojn kaj rimedojn kiel eble plej efike.

AEI konsistas el du kolektivaj membroj: SIPU en Afriko kaj KCE en Eŭropo. Ĝi planas organizi la 6an Afrikan Esperantologian Semajnon fine de 2019 aŭ komence de 2020 en Buĵumburo.