Senatokonsulto pri reprezentaj donacoj
Hieraŭ startis la senatokonsulto pri la leĝopropono prezentita de du senatanoj el la Verda grupo: Anatolo Gonĉarov kaj Perla Martinelli. Temas pri normigo de la donacoj ricevitaj de la Konsulo kaj aliaj gecivitanoj en sia ofico de reprezentantoj de la Esperanta Civito.
En la svisa Civila Kodo mankas normo pri la donacoj ricevitaj de la reprezentantoj de la popolo. Mankas ankaŭ specifa leĝo de la svisa Parlamento; sed eĉ se ĝi ekzistus, ĝi ne helpus al ni, ĉar al la svisa Civila Kodo nia Konstitucio agnoskas nur subsiduan valoron. Ja neniu normo ekster la Civitaj havas leĝan valoron por ni, escepte de la Universala Deklaracio pri la Homaj Rajtoj. Konsekvence ni bezonas propran disciplinon pri la temo.
Kial la temo estas grava? Unuavice, ĉar ĝi estas plia paŝo al la diferenciĝo de la Esperanta Civito el la malnova Esperantio, por ke ĝi estu perceptata kiel transnacia subjekto submetata al propra juro, kaj ne kiel ajna internacia neregistara asocio, tamen submetata al iu ŝtata juro (nederlanda por UEA, franca por SAT, ktp). Duavice, por emfazi la demokration de niaj strukturoj. Triavice, por eventuale garantii plian enspezofonton al la Civito, sen impostado.
La leĝopropono fiksas la limojn laŭ kiuj la reprezentantoj de la popolo posedas la donacojn ricevitajn pro sia reprezenta ofico. Por ne balasti la administradon, tiuj donacoj apartenu al la Esperanta Civito nur se ili superas sumon, provizore fiksitan je kvincent eŭroj laŭ la eventuala impostodeklaro.
Kiuj reprezentas la Civiton, kaj do la esperantan popolon, tiuj estas difinitaj en la art. 19 kaj 20 de la Konstitucio. La reprezentan oficon plenumas nur la ekzekutiva povo, tra la Konsulo kaj ghiaj delegitoj (vickonsuloj) kaj subdelegitoj (aktistoj, legacia stabo).
En la senatokonsulto jam intervenis la Ruĝa opozicio, kun kritikoj al kiuj respondis unu el la proponintoj. La debato daŭras.
[HeKo 407 3-C, 20 okt 09]
