Paŝoj al plena reeldono
La librofako de LF-koop komencas ĉi-monate la enpaĝigon de la nova eldono de "Paŝoj al plena posedo", la klasika lernolibro por progresantoj, verkita de William Auld.
La nova eldono treniĝis dum kelkaj jaroj, sed lastatempe ĝi ricevis definitivan akcelon danke al la kresko de la telematika esperanto-instruado. Certe nur malgranda procento de la eklernintoj per Duolingo atingos nivelon de progresantoj, sed ili konsistigas kvanton statistike multe pli rimarkindan ol antaŭe.
"Paŝoj al plena posedo" estas la teksto rekomendata por prepari sin al la B.2-nivelo, laŭ la LingvoTesta Sistemo de la Esperanta Civito.
(HeKo 650 1-B, 1 jul 17)
