La ĉina viruso ne modifas nian kalendaron
Malgraŭ la viruso origininta el Popola Ĉinio kaj atakanta la tutan mondon, estos prokrastita nur unu aranĝo de establoj aliĝintaj al la Pakto por la Esperanta Civito: do regule okazos ĉiu evento en la kalendaro de KCE en Svislando, ekzemple.
La prokrasto trafas nur la 5an Danuban Esperanto-Rendevuon en Budapeŝto, ĉar ĝi estas la sola ne rezervita al nur esperantlingva publiko. Estas planata ĝia okazigo en oktobro 2020, dum la Internacia Semajno de la Esperanto-Biblioteko.
La parlamenta sesio de la 20a de marto ne estas prokrastita, same ne la literatura kafejo: ili ambaŭ ne kunigos pli ol kvindek personojn, kio estas la nombro fiksita de la hungaraj aŭtoritatoj. Hungario statistikis ĝis nun nur dek ses infektitojn; kelkaj kuŝas en la hospitalo kie Kolomano Kalocsay laboris kiel ĉefkuracisto.
Bedaŭrinde el Italio neniu parlamentano povos partopreni en la inaŭgura sesio, ĉar tiu lando estas komplete kordonita.
[HeKo 730 2-C, 11 mar 20]
