Jubileo de Alessandro Bausani festota de IIC
La plej fama klerulo pri interlingvistiko en Italio dum la dudeka jarcento, Alessandro Bausani, estus centjara la 29an de majo 2021. Prof. Bausani, konata islamologo kaj iranisto (interalie tradukinto de la Korano al la itala) kaj grava bahaa intelektulo, posedis ankaŭ nian lingvon kaj estis honora prezidanto de Itala Interlingvistika Centro, ĝis sia morto (1988).
Tial estas memkompreneble ke la Komitato de IIC ĵus decidis dediĉi al Bausani sian kvaran interlingvistikan seminarion, kiu estas planita por 29 majo 2021 en urbo Mantuo. La programo de tiu studa tago grandparte koincidos kun tiu de la dua seminario, bedaŭrinde ne okazinta la pasintan majon pro la pandemio. La elekto de la temaro certe kongruas kun la ĉefa interlingvistika intereso de tiu klerulo: la sekretaj lingvoj.
Krom la anoncotaj sabataj prelegoj, inkluzive de laŭdacio pro la jubileo, dimanĉon 30 majo 2021 okazos ekskurso al la renesanca planurbo (ideala civito) Sabloneto, kie ĝuste antaŭ dudek jaroj estis promulgita la Konstitucia Ĉarto de la Esperanta Civito.
[HeKo 743 1-B, 2 sep 20]
