La Asembleo de la Esperanta PEN kunvokita al Svislando
Same kiel LF-koop kaj KCE, ankaŭ Esperanta PEN-Centro havos realan Asembleon en Svislando, ĉe la Esperanto-Domo en Ĉaŭdefono. La verkistaro kunvenos 9 aŭgusto 2021, verŝajne sub la gvido de la vicprezidanto, sen. Georgi Mihalkov, ĉar la prezidanto, c-ano Tomasz Chmielik, delonge misfartas.
Krom renovigi la estraron kaj akcepti novajn aliĝojn, la Asembleo okupiĝos pri la aktiveco kadre de la jubilea jaro de PEN Internacia. La prestiĝo de nia literaturo kreskis dum la baldaŭ 30-jara ekzisto de nia Centro, danke al la aktiveco de ĝiaj membroj.
Lastatempe nia literaturo estis inter la kvindek reprezentataj en la jarkunveno de la internacia Komitato pri verkistoj en prizono kaj baldaŭ ĝi estos unu el la tridek reprezentataj en la jarkunveno de la internacia Komitato de verkistoj por paco.
[HeKo 764 3-B, 22 maj 21]
