Konstanta akceptotago en niaj Esperanto-Domoj
La Esperanto-Domoj kaj aliaj sidejoj ene de la Pakto por la Esperanta Civito iom post iom elektas tagon de la semajno por akcepti vizitojn. Ekzemple la naturamika Esperanto-Domo en Malago (Hispanio) principe akceptas gastojn ĵaŭde, fine de la posttagmezo. Certe eblas esceptoj, ĉar ĵaŭdo povas esti ordinara festotago, aŭ grava gasto povas aperi en alia tago.
Unu el tiuj esceptoj estis la hodiaŭa vizito de s-ro Normand Fleury el Kanado, prezidinto de la LKK de la lasta Universala Kongreso. Li estis akceptita de tri membroj de Esperanta Naturamikaro: gec-anoj Perla Martinelli (vicprezidanto), Manuela Blanco (sekretario) kaj Carlos Spinola. Li reiros al la Domo post kelkaj tagoj, por dua vizito kun sia edzino, s-ino Zdravka Metz.
Dum la akcepta tago eblas aĉeti varojn el la loka libroservo kaj pagi abonon al "Literatura Foiro" kaj "Heroldo de Esperanto". En la kazo de ENa, informiĝi pri la aktiveco de la (politike ne indiferenta) naturamika movado, kiu ekestis en 1895.
[HeKo 798 5-B, 23 okt 22]
