Pedro Carrillo, aktoro kaj reĝisoro, proponas realigi spektaklon en Burundio, okaze de la venonta Kristnasko. Temas pri “kripa prezento”, kun muziko kaj kantoj, ilustranta la naskiĝon de Jesuo. De pluraj jaroj c-ano Carrillo enscenigas tian religian akton en Andaluzio: li opinias ke afrikanoj tute taŭgas por tiu ĝenro.

La kazo Dmitrij Bogatov evoluas espereble al bona solvo por la akuzito. La rusa ministerio pri internaj aferoj, pere de propraj ekspertoj, ne konstatis lin kulpa pro alvokoj al terorismo. Tamen la juna moskva esperantisto restas en hejma aresto: li rajtas nek eliri nek komuniki eksteren, escepte al gefamilianoj.

Nur ses virinoj situas inter la 52 vivantoj en la libro “Nia diligenta kolegaro”, kiu ampleksas ducenton da plej gravaj esperantistoj en la mondhistorio, laŭ la opinio de la eldonejoj (Sezonoj en Rusio kaj LEA en Litovio).

Preskaŭ unuanima indiko pri la krizo de Universala Esperanto-Asocio, kiel ĉefa bemolo de la jaro 2017, laŭ sondado farita de “La Ondo de Esperanto”. Tamen estas interesaj la diversaj nuancoj.

Sekve de kontakto inter Esperanta Naturamikaro kaj la kultura societo Sociedad Erasmiana, hieraŭ ĉi-lasta invitis prof-ron Giorgio Silfer prelegi en la hispana pri la originoj de esperanto, koincide kun la centa datreveno de la forpaso de Lazaro Ludoviko Zamenhof, en prestiĝa sidejo ĉe la urbocentro de Malago.

Komence de la 1970aj, surbaze de spertoj en civilservaj laborkampoj, Renato Corsetti kaj Nino Vessella eldonis valoran manlibreton: “Ĉu vi parolas tendare?”. Probable unu el la plej interesaj atingoj de la esperanta didaktiko. La verko celis instrui la lingvon je elementa nivelo al homoj en internacia laborbrigado, por ke ili havu vehiklan lingvon, anstataŭ la franca aŭ la angla.

Pro Esperanto analizas periode la situacion de diversaj subjektoj ekonomie kaj strategie gravaj en Esperantio, por indiki kie valoras investi aŭ prunti, fari legacon aŭ donacon.

UEA 2000,53 — je minus 0,66% ĉar la bremso de la membrofalo ne kongruas kun kreskanta interna opozicio, precipe post la diskonigo de la kandidatiĝoj al la posteno de ĝenerala sekretario.

“Kion signifas kandidati por la literatura Nobel-premio?” demandis la ĉefredaktoro de “Literatura Foiro”, Zlatoje Martinov, en intervjuo aperonta en LF 291 (februaro 2018). “Prioritate disvastigi la esperantan literaturon” respondis Giorgio Silfer, kiun la LF-abonantaro ĵus indikis per referendumo kiel nian plej popularan verkiston, kune kun Spomenka Ŝtimec, se temas pri verkistino.

La epifania sorĉistino, konata en la plej parolataj lingvoj per sia itala nomo (Befana), metis donacon en la ŝtrumpon de Universala Esperanto-Asocio: 162 individuaj membroj pli ol en 2016.

Estas prespreta la unua numero de “Heroldo de Esperanto” en 2018. Ĝi konsistas el kvar paĝoj en formato A3, laŭ grafiko simila al tiu kiu karakterizis ĝin antaŭ 2017. Tamen la enhavo kaj la aperofteco ne estos plu tiuj de la du jardekoj ĉe LF-koop, kiu produktis numeron je ĉiu tria semajno, kaj etendis la informadon al ĉiuj sektoroj de Esperantio.

Subite demisiis la prezidanto de Tutmonda Esperantista Junulara Organizo, Enric Baltasar (pseŭdonimo de Pau Codina Alemany). Lia prezido daŭris malpli ol kvin monatojn kaj ĉesis post (ĉu pro?) konflikta decido de la TEJO-Komitato, kiu rifuzis al li ofici kun honorario en Roterdamo, kiel kunordiganto de la surloka junulara stabo.