La privata lernejo LEST en Barbarano de Salò (Lombardio) gastigis la lingvotestan sesion de Kultura Centro Esperantista, 23-25 majo 2019. Komisionanoj Marie-France Conde Rey, Perla Martinelli kaj Giorgio Silfer taksis la lingvan kompetenton de tri kandidatoj, laŭ la direktivo Muhlemann (pri la LingvoTesta Sistemo de la Esperanta Civito).
Pola literatura tradukisto, eseisto kaj redaktoro estas la nova prezidanto de Esperanta PEN-Centro. C-ano Tomasz Chmielik estis unuanime elektita hodiaŭ vespere fare de la Asembleo kunvokita al Barbarano de Salò, prezidata de c-ano Carlo Minnaja. Vicprezidanto restas c-ano Georgi Mihalkov, por la mandato 2019-2021.
Malgraŭ la subita retiriĝo de la itala partnero (naturamika domo de Monto Baldo) kaj la sekva nuligo de la semajno pri oficinalaj plantoj, Esperanta Naturamikaro sukcesis organizi agrablan ekskursaron de la 20a ĝis la 23a de majo 2019 ĉe la Garda Lago, kun la partopreno de Esperantianoj el ses landoj kaj du kontinentoj.
La Komitato de Kultura Centro Esperantista kunvenis hodiaŭ en Salò (Lombardio), unuafoje en pleno, kun la partopreno de ĉiuj komitataninoj: ĝi ja konsistas el kvar virinoj. Estis invititaj ankaŭ ĉeestanta deĵorintino, la revizoro kaj alia apoganto.
Tazio Carlevaro, Carlo Minnaja, Giorgio Silfer celebris hodiaŭ en Bolonjo kun trideko da abonantoj kaj geamikoj la kvindekan datrevenon de la fondo de la literatura rondo “La Patrolo” (1969-79), kiu en 1970 fondis la revuon “Literatura Foiro”, ankaŭ en sia kvindeka jarkolekto senpaŭze.
La financa krizo de Universala Esperanto-Asocio fontas el la aprobo de deficitaj spezkalkuloj, kaj eĉ de fantaziaj buĝetoj, kiuj prognozis la eniron de grandaj subvencioj apenaŭ aŭgureblaj. Aldone, la Asocio aprobis la elspezon de fantastaj sumoj, kiel cent mil eŭroj por neniam realigita universala retejo.
HeKo 709 2-C, 14 maj 19
La Kapitulo de la Esperanta Civito kunvenos en Lombardio tuj antaŭ la parlamenta sesio, kunvokita al la urbodomo de Salò, 24 majo 2019.
Ĉiuj komitatanoj de LF-koop kaj KCE estos fizike en Salò (Garda lago) venontsemajne, kaj tial ili kunvenos 22 majo 2019 en la koncernaj instancoj.
Dum la lastaj kvar monatoj la estraro de Tutmonda Esperantista Junulara Organizo perdis kvin el naŭ membroj, inter eksigoj, eksiĝoj kaj malaktiviĝo. Ĉi tiu situacio ekis jam en 2017, kiam la prezidanto mem (hispano) subite demisiis post nur kvin monatoj, kuntrenante estraranon kiun li mem forte rekomendis.
Hodiaŭ en Sibiu (aŭ Hermannstadt, Rumanio) la reprezentantoj de la EU-ŝtatoj kunvenis okaze de la Eŭropa Tago unuafoje sen Britio, kvankam jure ĉi-lasta ankoraŭ membras en Eŭropa Unio; fakte la britoj ankoraŭ elektos siajn deputitojn al la EU-Parlamento, post du semajnoj.
La redakcio de “Literatura Foiro” skajpe kunvenis hodiaŭ vespere por pritrakti la enhavon de la numero 299 (junio 2019), sub la gvido de la ĉefredaktoro, Perla Martinelli. La 64-paĝa numero estis finredaktita: ĝi estos riĉe diverseca kaj tre akurata, kiel kutime. Rimarkinda la partopreno de aŭtoroj el kvin kontinentoj.
Ekde 2017 ne plu deficitas la jara spezkalkulo de Esperanta PEN-Centro, kaj tiu pozitiva tendenco firmiĝis en 2018. La financa raporto liverota al la Asembleo (en Lombardio, 24 majo 2019) ree prezentas modestan profiton, kaj la bilanco estas praktike senŝulda.
