“La 3an de majo 2017 la membronombro estis 3.642, kio signifis malkreskon de 140 kompare kun la sama dato de 2016” publike ĵus deklaris komitatano Osmo Buller rilate la ĉi-jaran individuan membraron de Universala Esperanto-Asocio.
Ĉi-monate estos finita la redaktado de la informa PEN-kajero pri nia literaturo, en la franca lingvo, kiu poste utilos kiel matrico por la versioj en la kastilia kaj en la angla. Ĝi ampleksos sesdekon da paĝoj en formato A5, simile al numero de “Literatura Foiro”: ankaŭ la arkitekturo de la presaĵo memorigos nian ĉefan kulturan revuon.
Sekve de publika anonco, diversaj afrikanoj kandidatiĝis por la posteno de afrika kunlaboranto ĉe la periodaĵoj de LF-koop. Du estis specife interesaj, kaj inter ili la elekto favoris c-anon Mushosi Birindwa el Buĵumburo.
Meze de julio Sociala Grupo Lexus el Brazilo anoncis, ke dum la nuna jaro aperos nur ses numeroj de “Heroldo de Esperanto”, do ankoraŭ kvin. Malgraŭ tiu promeso, en septembro ankoraŭ ne aperis la dua numero de HdE en 2017, eĉ ne retforme.
La traduka konkurso de la Itala Esperanto-Federacio havis jenajn rezultojn:
Branĉo poezio (12 konkursaĵoj de 8 konkursintoj el 4 landoj): 1a premio al Nicolino Rossi (RSM); 2a premio al Nicolino Rossi (RSM); 3a premio al Aldo Grassini (IT).
HeKo 656 2-C, 3 sep 17
La interna servo de fondumo Pro Esperanto preferas ne diskonigi la rezulton de Universala Esperanto-Asocio dum aŭgusto 2017, ĉar tio montrus subjekton kie ne indas investi. La situacio, jam malbona fine de julio, pli graviĝis pro kreskantaj misservoj.
Septembro alportas tute akurate la sepan numeron de la monata informilo de KCE, kiu tiel pruvas sin kapabla produkti regule periodaĵon, kvankam modestan: ĝi similas al nur dupaĝa “Heroldo de Esperanto”, laŭ la antaŭa grafiko.
Hieraŭ posttagmeze forpasis d-ino Marjorie Boulton (1924[1949]-2017), kiu dum jardeko estis la kandidato de Esperanta PEN-Centro por la literatura Nobelo, post la morto de William Auld. Ŝi malsanis jam de kelkaj jaroj, sed sukcesis ankoraŭ partopreni, sur rulseĝo, en la Universala Kongreso de Lillo, 2015.
Pli ol 450 gelernantoj vizitadis la privatan instituton Zamenhof en Lomeo dum 2016/17, laŭ statistiko ĵus komunikita de c-ano Koffi Gbeglo. Ili estis distribuitaj sur dek klasoj laŭ du niveloj: ses elementaj kaj kvar mezgradaj. La mezgradaj havas pli da aliĝoj, ĉar ĉiu klaso averaĝe superas 45 kaj eĉ 50 gelernantojn, dum la elementaj apenaŭ atingas 45, foje eĉ ne 35.
