La tradicie renoma socikultura revuo de TEJO, “Kontakto”, kies ĉefredaktorino estas Ĵenja Amis, dediĉis sian lastan numeron 214 (aŭgusto 2006) al la temoj “Egalaj rajtoj / feminismo”. Feminismo fakte okupas nur kelkajn paĝojn, sed interalie la revuo aperigas la tutan Deklaron de Feminisma Esperanta Movado, okaze de la Oka de Marto 2006.

Interkonsente kun ĉiuj ĉefkandidatoj al la Konsuleco (Holevitch, Rooke, Silfer), la Konsulo de la Esperanta Civito, prof. d-ro hab. Walter Zelazny, kunvokos la inaŭguran sesion de la Parlamento al Rezovio (Rzeszów) Pollando, por la semajno 10-16 marto 2007.

La estraro de la akcia kompanio kiu posedas la Polan Radion kaj administras ĝian poreksterlandan programon “Radio Polonia” planas forigi la esperanto-elsendojn. La definitiva decido apartenas al la pola Ministerio pri Eksteraj Aferoj.

Kreŝimir Barkoviĉ lasos la postenon de ĉefredaktoro de “Sennaciulo”, la organo de SAT, fine de decembro. Li restos en la redakta stabo (por lingva kontrolo kaj korekto de presprovaĵoj) de la gazeto, kiu tamen ne plu aperos monate, sed dumonate: ses numeroj jare kun pli da paĝoj, principe ses duoblaj numeroj.

Itala Interlingvistika Centro estas preparanta proponon de direktivo, submetotan al la aprobo de la Forumo de la Esperanta Civito, por la organizo de Biblioteka Reto de Esperantio.

Ĉu fari bonajn laborojn estas kulpe? (…) Necesas legi estrarraporton de UEA en Revuo Esperanto de junio 2006 por senti ion tian. La antaŭa Afrika Oficejo en Togolando laboris perfekte. Tamen UEA-gvidantoj rifuzis al ili la daŭrigadon de la laboroj. Ĉu vi scias kial? Simple, ĉar la togolandanoj de AO klopodis, ke afrikanoj enprofundiĝu en Esperantajn aferojn.

La oktobra numero 223 de revuo “Literatura Foiro” proponas fragmenton el “Retrovo” de Fred Uhlman, lastan tradukon de William Auld, kun komentario de Perla Martinelli. Poemoj de Giorgio Silfer, Benoit Philippe kaj adiaŭa saluto de Manuel de Seabra omaĝas la forpasintan William Auld.

“Pro diversaj kialoj, kaj precipe financaj kaj manko de kunlaborantoj, ROK-gazet’ ĉesos aperi sub papera formo. ROK-gazet” abonantoj povos elŝuti retan version en la paĝoj de EUROKKA post kelka tempo. La redakta teamo sub la gvido de Armela Piolat kaj Tony Guyot laboras pri reta versio kiu evoluos laŭ la fluo de la informoj.

La unua numero de la unua literatura revuo en esperanto, iniciatita de Carlo Bourlet per la eldono de Hachette en Parizo, aperis en septembro 1906.