Ĵus aperis “Sentiments”, okminuta filmo en lumdisko (DVD), informanta pri Esperant(i)o el raŭmisma vidpunkto. Ĝi estis realigita de studentoj en la Belarta Altlernejo de Angulemo (Francio), neesperantistoj, kiuj pli rapide kaj pli bone komprenis raŭmismon ol ĉiuj finvenkistoj kalumniantaj ĝin en diversaj latitudoj.
LF-koop estas produktanta duoblan KD-on kun la tuta teksto de “La infana raso”, deklamita de William Auld, kun interesa kaj aparta muzika fono por ĉiu ĉapitro. Auld surbendigis sian ĉefverkon en ekskluziveco por LF-koop en 1999. La produktado realiĝis parte en Meksiko parte en Eŭropo, okaze de la 50a datreveno de la unua eldono.
La arbitracia instanco kiu oficos ekde 1 marto 2008 pruvas la tutmondiĝon de la Esperanta Civito, kie kvin el la nunaj 22 paktintaj establoj situas ekster Eŭropo: Afriko, Ameriko, Azio. Kaj unu kortumano rezidas en Oceanio.
