La cindroj de Manuel de Seabra en la Esperanta Panteono
En 2011 c-ano Leen Deij estis la unua persono grava por la esperanta kulturo, al kiu la Civitaj instancoj asignis lokon en la Esperanta Panteono. C-ano Manuel de Seabra estas la dua: liaj cindroj estis ĵus liveritaj por transdono, fare de la vidvino, c-ino Teresa Almeida.
En unua momento ŝi pensis pri enterigo ĉe Monserrat, tamen prosperis al ŝi la ideo ke la cindroj de la edzo ripozos en Esperantio. Manuel de Seabra, origine portugala kaj adopte kataluna, fakte havis multe pli vastan, transnacian horizonton.
La formala dediĉo de la urno okazos je la venonta Tago de Ĉiuj Pioniroj, 14 aprilo 2018, konforme al Lex Bertilia. Intertempe la cindroj estos gardataj en sekura loko.
Pri la apliko de la normo en ĉi tiu kazo okupiĝas la Vickonsulo, sen. Giorgio Silfer, pro sia persona amikeco al la forpasinto.
(HeKo 649 2-C, 21 jun 17)
