HeKo 737 1-C, 10 jun 20
La Kapitulo estas kunvokita al ordinara skajpa kunveno, 17 junio 2020 je 10h00 (MET), sub la prezido de la Konsulo, sen. Riichi Karibe.
En la tagordo elstaras la eksteraj rilatoj kaj diversaj projektoj. Specife moviĝas la formado de kadroj, la propono pri sidejo de Islama Esperanta Klubo en Buĵumburo, la smeralda jubileo de la Manifesto de Raŭmo, la regia aktiveco de Pro Esperanto.
Sennacieca Asocio Tutmonda ne profitis el sia lastjara kongreso en Barcelono, duoble pli partoprenita ol kutime: la membraro malkreskis je pli ol dek procentoj, de 446 en 2018 al 400 en 2019. La kotizaro fidele spegulas tiun konstantan regreson: 19.000 eŭroj en 2017, 16.000 en 2018, malpli ol 14.000 en 2019.
“Heroldo de Esperanto” n-ro 2309 (junio 2020) estas en la leterkesto de siaj abonantoj, kun interesaj kontribuoj al diversaj debatoj: pri financoj en Esperantio, pri raŭmismo, pri indiĝenaj lingvoj, pri onomastiko. Aldone multaj informoj el la esperanta mondo, precipe la konsorcio de la Pakto.
Post la rezigno de britoj respektive sudkoreoj, Tutmonda Esperantista Junulara Organizo lanĉas trian alvokon por la okazigo de sia kongreso. Sed el la kvar kandidatoj kiuj pretis inviti IJK-on 2021, post la maltrafa elekto favora al pacifika insuleto reproponus sin nur unu, kaj ĝi ne estas la svisa.
Estas presata la nova eldono de “Plena Ilustrita Vortaro de Esperanto”, kies ĉefa novaĵo ŝajnas la enmeto de referencoj al la 9a Oficiala Aldono, tiel ke 209 kapvortoj estas nun signitaj per la cifero 9.
Pollando ne portas bonan ŝancon al la Sennacieca. La invito al kongreso en Varsovio dum 1987 estis rapide nuligita en 1985, kiel konsekvenco de la puĉo ene de Pola Esperanto-Asocio. La SAT-kongreso en Bjalistoko, julio 2020, estis ĵus nuligita pro la pandemio.
La (tro?) frua rezigno de la nederlandanoj organizi Internacian Junularan Kongreson en 2020 kuntrenis ankaŭ la rezignon de la sudkoreoj pri IJK en 2021. Sed la gvidaj instancoj de TEJO intencas okazigi IJK-on fizike en 2021 kaj tial ili ĵus relanĉis konkurson, kun unua limdato 30 junio 2020.
La esperanto-junularo aspektas fenomeno relative pli kompakta ol pliaĝaj movadoj. SAT-junulfako praktike ĉesis antaŭ jardekoj, dum TEJO pli kaj pli kreskis ekde la 1960aj.
HeKo 736 2-C, 2 jun 20
La centdudektria datreveno de la cenzura permeso pri la Unua Libro de Doktoro Esperanto (2 junio 1887) ĉi-foje koincidas kun la ora jubileo de Plena Ilustrita Vortaro, aŭtorita de Gaston Waringhien, fakte ankoraŭ la sola granda vortaro esperanta-esperanta.
HeKo 736 1-C, 31 maj 20
Post konsultiĝo kun la senataj grupestroj kaj ricevinte la konsenton de la Esperantista Domo de Kulturo “D-ro Ivan Kirĉev”, la Konsulo de la Esperanta Civito, sen. Riichi Karibe, decidis kunvoki la parlamentan sesion al Razgrado (Bulgario), komence de junio 2021.
HeKo 735 9-C, 26 maj 20
Fatala malsano (kancero ĉe pulmo) jam de tuta jaro malfortigis c-anon Hilary Bill Chapman (1950-1967-2020), kiu fine forpasis la 21an de majo pro komplikaĵo kaŭzita de la pandemia viruso.
“UEA pretas en la venontaj jaroj kongresi en Afriko, nia lulilo, kaj tiel ebligi al homoj de la tuta mondo kunfratiĝon en la plej bona afrika etoso, per kiu afrikanoj normale festas tiun ĉi tagon. Vestitaj per grandiozaj tradiciaj kostumoj, homoj de pluraj landoj okazigas spektaklojn kaj festivalojn ĉirkaŭ kulturo, gastronomio kaj diverseco de kutimoj en la kontinento”.
